Os Amcar Club og Er-An Veikro 4 juli 2016

Knut er best på børning

VIDEO: Sjå heile amcar-paraden og alle deltakarane i den heftige burn out-konkurransen på Røykenes 4. juli.

image
image
image
image
image
image
image
image
image
image
image
image
image
Av: Kjetil Vasby Bruarøy

Måndag blei den amerikanske frigjeringsdagen feira med amcar-parade frå Røykenes til Halhjem og svidde dekk til dessert.

Arrangørane, Os Amcar Club og Er-An Veikro kan gle seg over endå betre oppmøte enn i debuten i fjor, over 90 bilar stilte i paraden og børnekonkurransen hadde dei 8-10 bilane dei hadde plass til i programmet (nærmare bestemt 9).

– Vi er overraska og glade for at vi, trass vekslande meldingar og mykje regn på dagtid, også etter at paraden starta, hadde så mange med på paraden.

– Vi er ekstra takksame for alle som stilte opp langs vegane for å laga stemning, seier Linda Andersen, som i motsetnad frå i fjor sjølv tok seg fri frå å delta.

Linda var den einaste i paraden som køyrde «topplaus», og fekk ei god byge om bord i cabrioleten i starten på paraden. Men så letta det og Linda og venninna Mia kom tilbake med to store smil.

Det sto folk på fleire busstopp og i Os sentrum, men det beste publikummet var nok på Lekven, der halve «Julabygdo» sto samla på brua over E39 Halhjemsvegen

Det var òg godt publikum til børnekonkurransen, skyttebussen gjekk i eitt mellom parkering hos Betonggulv ved Stilvoll og til Er-An Veikro, som hadde reservert parkeringsplassen sin for amcars denne ettermiddagen.

Erfaren debutant

Ein av deltakarane i paraden var Frithjof Tøsdal (67). Han var ikkje med i fjor, men stilte i år med ein ’59 Cadillac cabriolet som han kjøpte i Los Angeles i 1982, men først fekk registrert for tre dagar sidan.

Tøsdal har hatt amcar sidan han var 14 år og kjøpte sin første Cadillac i 1975. No har han sju cadillac-ar, fire som står i Noreg, tre som står i Spania, der han har feriehus.

– På 70-talet kosta det nesten ingenting å ta med seg ein Cadillac heim, eg har kjøpt med meg ein bil kvar gong eg har vore i USA. No kan det fort bli mange hundre tusen. Denne har eg gjort lite med, den er omlakkert og så har eg fått han krumma på nytt. Støtfangarane har eg tatt med meg til Spania og fått fiksa i Valencia, fortel Frithjof.

Røykla Røykenes

Dei ni deltakarane i burn out-konkurransen leverte frå første turn.

Kent Ivar Mjølkeråen var førstemann som dekka heile bilen sin med røyk, og det med ein dieselbil med knastedekk.

Mjølkeråen måtte likevel nøya seg med 3. plass etter at Frank Hetleflåt (2. plass) og Knut Hetleflåt hadde svidd sine bakdekk i fleire minutt.

Knut fekk nye dekk i premie, men det var òg premie til 2. plass, 3. plass og til fleire som var heldige i loddtrekninga på dei andre premiane.

– Vi var veldig heldige som fekk med oss Kurt Ljones frå Askøy Amcar som speaker, han var med og lagde ei god ramme på dette. Vi har fått kjempegode tilbakemeldingar på markeringa og har fått sett at det fungerer også på ein grå og våt måndag, seier Linda Andersen.