Kontrollert kaos

Det herska ei litt hektisk stemning og lettare kaos då midtsiden.no stakk innom Fjellheim torsdag kveld for å få med seg delar av første heile øving til Os kulturskule og Opera Omnia sin framsyning - Ole Bull Quiz som dei set opp i helga.

- Det er nett slik det skal væra. Dette kjem ungane til å fikse heilt flott, beroligar regissør Heidi Tronsmo.

For første gong skulle heile programmet prøvast med konferansier, musikarar og dansarar. Noko finpuss sto nok att då midtsiden.no forlot dei, men at det kjem til å bli ei annerleis Ole Bull-framsyning er vi ikkje i tvil om.

Multimedia-show
Det første som slo oss då vi kom inn i Fjellheim var, kva skjer?

Her var alt snudd på hovudet i høve til kva vi er vant med. Scena var gjort om til sitteplassar for publikum og salen gjort om til scene.

- Quiz er eit kjent format for mange, her har vi freista å lage ein quiz-kafé kor publikum blir eindel av framsyninga, fortel Glenn Erik Haugland som òg lovar servering av kaffe, kaker og saft.

Mykje gamalt utstyr
For to veker sidan gjekk rektor Christian Breistein og lærar Gry Pladsen ut i midtsiden og etterlyste gamalt musikkavspelingsutstyr.

- Vi har fått mykje utstyr, ikkje alt fungerar, men det brukar vi som kulissar, fortel Tronsmo.

I salen finn vi gamle sveivegrammofonar, kassettspelarar og filmframvisarar. Eindel av utstyret kjem publikum til å stifte nærare kjennskap med, mellomanna gjennom cd-orkesteret.

Tre framsyningar
Premiere på framsyninga er laurdag kl 15.00, men det blir òg to framsyninger sundag kl 15. og 17, før det blir skuleframsyningar måndag og tysdag.

Billettar er lagt ut for sal på Musikkverket på Flåten og på biblioteket.