Mange raude prikkar

Separatutstillinga "Livets stier & former" med Ramon E Haiti Filiu i Hvelvet på Oseana blei ein suksess frå første dag.

- I løpet av dei første to-tre dagane selte han om lag halvparten av bilda, fortel arrangementssjef Berit Steen.

Bilda heng framleis i utstillinga, men har fått den vesle raude merkelappen som fortel at det er selt.

- Ramon er sjølvsagt svært nøgd med den mottakinga han har fått på Os.

- Rundt 150 personar fann vegen til opninga av utstillinga og han har så langt selt for cirka 180.000 kroner, seier Steen.

Glad dei tok han inn

Glad er også Steen for at Oseana valte å akseptera søknaden frå Haiti Filiu om å få ha utstilling i Hvelvet.

- Det er jo ikkje berre å koma hit og henga opp bilde eller kunstverk.

- For å få utstilling i galleriet må ein søka og visa fram nokre av verka.

- Ramon gjorde det og vi vurderte CV-en hans.

- I tillegg tok han turen ut til oss for å vise eit par av bilda. Teknikken han bruker med mykje struktur i bilda er ikkje heilt lett å sjå på eit fotografi, smiler Steen medan ho viser fram kommentaren i gjesteboka som fortel om gjesten som skriv ho hadde mest lyst å ta og føla på bilda.

Utstillinga blir ståande til 11. mars.