Mann med hammar slapp unna varetekt

Onsdag i førre veke blei ein politibetjent lettare skadd då ein mann i 40-åra kasta ein hammar i hovudet på vedkomande.

Sikta blei tatt med til arresten i Bergen og framstilt for varetektsfengsling fredag. Påtalemakta ba om fire veker varetekt.

Retten fann at sikta med god grunn kan mistenkast for straffbar handling som kan medføra strengare straff enn 6 månadar fengsel.

Sikta opplyser at politiet ikkje identifiserte seg sjølv, og at han derfor følte seg truga. Dette er i strid med vitne på staden si forklaring, noko som retten la til grunn.

Det neste retten måtte vurdera var om det var fare for gjentaking, slik påtale argumenterte for. Sjølv om tiltalte er dømt fleire gongar tidlegare, òg for vald mot politiet, meinte retten at det ikkje er fare for gjentaking.

Retten viste til at sikta ved tidlegare dom med delar av straff på vilkår har halde seg unna lovbrot i prøvetida, og at denne episoden er meir prega av ei frittståande hending.

Sikta blei fredag sett fri.