– No går startskotet

Bildeserie:

1 av 8

I formannskapet tysdag presenterte utviklingsdirektør for Lyseparken Fredrik Seliussen og Sjur Frimann Hjeltnes frå ABO Arkitektur dei nye oppdaterte planene for næringsarealet i Endelausemarka.

– No har vi fått på plass planeringshøgder og korleis vi skal forma terrenget. Skissene de ser i dag har tatt dette inn i seg.

– Vi har jobba med å ta vinnarkonseptet eit steg vidare og leggje grunnlaget for endeleg val av konsept og for ei ny, meir detaljert regulering, enn det den flatereguleringa som er vedteken tidlegare tek inn i seg, forklarte Frimann Hjeltnes.

600 000 kvadratmeter med bygg

Dei to fortalte at det har vore ein krevjande prosess med ulike diskusjonar.

– Ei av dei mest krevjande oppgåvene har vore å balansera kostandar opp mot inntektspotensiale og risiko. Ein kan velje ulike måtar. Ein kan tilrettalegga alt med veg, vatn og kloakk eller ein kan selja område tidlegare og la utviklar ta delar av desse kostnadane.

– Området er totalt på 719 000 kvadratmeter. 387 000 kvadratmeter av desse er det vi ser vi kan få til som ferdig planert areal.

– Vi har i moglegheitsskissene sett at det kan gje oss omlag 600 000 BRA med ein utnyttingsgrad på 200 prosent, forklarte Seliussen.

Ulike verksemder

I dei siste teikningane har dei fått mogleg innhold på plass for å dekkje ulike funksjonar.

– Dette er skisser på volumsstørrelser på kva vi kan få til. Av innhold har vi fått plass til ulike funksjoner som hotell, innfartsparkering, barnehage, butikk rundt kollektivterminalen, regional storhandel, litt mindre handel, industri og handverk. Vi har lagt inn ein skule og enno ein barnehage, meir industri og mykje kontorer. I tillegg til nokre bustadområder, ramsa Seliussen opp.

– Dette er eit 3. generasjonsnæringsområde, kor ein tenkjer mykje meir by-likt. Ikkje slik som dei har gjort på Sandsli og Kokstad kor det no går føre seg ein transformasjon, supplerte Frimann Hjeltnes.

Må få fyrtårn inn

Dei to la ikkje skjul på at det står att utfordringar. Ikkje minst i høve overordna styresmakter.

– Fylkeskommunen meiner vi skal leggja til rette for arealkrevjande verksemder som lager og logistikk, medan kontorarbeidsplassar skal ligga i byen. Fylkesmannen vil meir eller mindre at vi skal gjerda inn grøntområda. Vi må ta kampen med dei og få til dei gode løysingane. Målet om dei beste hovuda og dei beste henda står framleis fast.

– Det er viktig at vi får inn nokre fyrtårn i Lysekparken. Det er truleg essensielt for å lukkast. Vi må velgje klare konsept slik som IT Fornebu, Media City Bergen eller 2020park Stavanger. Det er ikkje sikkert vi skal velje berre eitt konsept, men vi skal ikkje opna opp alt.

Ønskjer innspel

–Kva vi skal velje er den jobben vi no skal gjera. Det er no startsskuddet går, påpeika utviklingsdirektøren som fekk støtte frå ordførar, og styreleiar for prosjektstyret, Terje Søviknes (Frp).

– Vi ønskjer alle innspel hjarteleg velkommen. Om debatten går i lokalpressa, så er det berre positivt, slik at vi kan leggje det til dei tankane prosjektorganisasjonen allereie har tenkt, poengterte Søviknes.

Vurderer fleire konsept

– Kva konsept har de tenkt på, og har de vore i dialog med dei andre aktørane og grunneigarane i området, undra Tone Hepsøe (Ap).

– Vi har vore innom fleire konsept, men det er litt for tidleg å seie for mykje om det enno. Vi har vore innom fornybar energi, helse og andre ting. Men vi har ikkje lyst å seie så mykje om det for då tek vi kanskje brodden litt av den gode diskusjonen vi håper vi kan få.

– Når det gjeld naboane så er vi i ein prosess. Vi har måtte halde litt hemmeleg rundt konsept fram til no fordi vi måtte sjå kva vi klarte å få til med masseutskiftingar og at det var realiserbart det vi jobba med i forhold til utnytting av området. Det veit vi no at det er, svara Seliussen som høsta godord frå formannskapet på at ein har tørt å tenkje store tankar og med visjoner.

– Eg er glad det er lagt eit ambisiøst preg på det. Dette er noko av det viktigaste som skjer og som får konsekvensar i lang framtid for heile Os, kommenterte Nils-Anders Nøttseter (MDG).

Prosjektstyret vil no køyre diskusjonar i ulike forum som kommunestyret, med næringslivet og andre før saka om konsept kjem opp som ei formell sak i kommunestyret til hausten.