Nytt firma overtar 104 båtplassar

Eit firma som er under etablering er i ferd med å overta aksjane i Os Invest AS, som eig den store marinaen ved leilegheitskomplekset Askvik Brygge. Det er 10 år sidan dei den gong ferske eigarane av anlegget oppgraderte frå 60 til over 100 båtbplassar i betongbrygge.

– Vi har nokre andre prosjekt i Os, og blei tipsa om dette anlegget av osingen Robert Nøss, som kjem inn som medeigar. Både lokaliseringa og anlegget framstår på ein positiv måte, dei førre eigarane har rusta opp til eit anlegg med vatn, straum og målarar i dei fleste båsane, fortel Marius Arnesen frå Bergen.

Han jobba som kost- og kontraktskontrollør innan oljebransjen før han flytta heim frå Singapore til Bergen i mars i fjor. Han starta to selskap i heimbyen, eit holdingsselskap og eit investeringsselskap, og held eit ekstra auge med Os.

– Eg har inntrykk av at kommunen har ein offensiv haldning til vekst og næringsetablering. Saman med bygging av ny E39 og etablering av næringspark i Endelausmarka gjer dette at Os er interessant på fleire måtar i åra som kjem, også når det kjem til båtplassar.

Vil selja på ein «ny» måte

Dei nye eigarane av marinaen vil selja nokre av båtplassane.

– For å få ei fornuftig finansiering av anlegget vil vi selja ei avgrensa mengde båtplasser. Vi har førebels ikkje bestemt kor mange, men responsen kom raskt, rundt 10 % av plassane er allereie selt.

Båtplassane blir selt utan tidsavgrenset bruksrett, slik båtplassar ofte blir omsett, med rett til båtplass i for eksempel 30 år.

– Her får du eigarrett over båtplassen din, i eit sameige, med eige skjøte, ein andel du kan ta med som tryggleik i banken, om du vil lånefinansiera kjøpet. Ordninga kan samanliknast med eit burettslag, der sameiget har ansvar for vedlikehald, forsikring og eventuelle investeringar.

Det er ikkje nytt regelverk som opnar for denne løysinga, men ein litt ny framgangsmåte, slik fleire av kjøparane opplever det.

– Dette gir tilsvarande fordel som å eiga bustad. Med dagens leigeprisar er renter og avdrag på lån billigare, du betaler dessutan pengane til ditt eige, og du får noko som kan gå i arv, som kan stiga i verdi og som kan seljast.

– Vi er nøgd med at salet er i gang, dei fleste til eksisterande leigetakarar. Førsteprioritet er uansett å ta vare på dei som allereie leiger, anlegget var nesten fullbooka, med 90 prosent belegg, då vi overtok, seier Arnesen.