Slo opp opne dører

I kommunestyret sitt møte i februar leverte Emil Tetlie Brimsholm (H) ein interpellasjon kor han ba kommunen om å vurdera aktivitetsplikt for sosialhjelpsmottakarar. Saka blei sendt til Tenesteutvalet for handsaming, før den kom oppatt i kommunestyret tysdag.

Utfordringa var berre at i mellomtida har regjeringa sendt ut ei høringsnotat kor dei fremjar akkurat det same forslaget.

– Sjølv om dette kan sjåast på som å slå opp opne dører, så skal vi hugsa at interpellasjonen blei fremja før høringsnotatet blei sendt ut.

– Difor må vi handsama interpellasjonen slik regelverket krev.

– Då interpellasjonen blei fremja så hadde kommunen ein rett til å krevja arbeidsplikt, men ikkje ei plikt, påpeika varaordførar Marie Bruarøy (H) etter at kommunalsjef Nils Petter Borge hadde orientert om ståa på NAV-kontoret i Os.

Ta systemet, ikkje klientane

Lars Atle Skorpen (Ap) hadde liten sans for framlegget.

– No høyrde vi at dei som har noko å bidra med, gjer det alle saman. Då er jo målet nådd. Vi treng ikkje noko vedtak på dette.

– Dette blir omtrent som om du produserar ein bil. Har du ein produksjonsfeil på bremsene, så kan du ikkje kalla inn alle bileigarane for å læra dei å bruka handbrekket. Då må du kalla inn bilane og fiksa feilen og gå gjennom produksjonslina di for å hindra at feilen oppstår igjen.

– Vi kan ikkje senda eit heilt kommunestyre etter dei som ikkje arbeider. Vi må i ta systemet og sjå om det er ting i forvaltninga hjå NAV som må gjera annerleis.

Forpliktar kommunen

Brimsholm fastholdt forslaget om å innføra aktivietsplikt.

– Det er kjempebra at vi ikkje har mange som ikkje arbeider for sosialhjelpa, men dette er med på å setja ein standard, kor kommunen òg forpliktar seg til å skaffa arbeidsplassar og å setja inn tiltak, påpeika Brimsholm.

Forslaget om at kommunen skal innføra aktivietsplikt, prioritera dei yngste sosialhjelpsmottakarane, men samstundes skjerma dei som av fysiske eller psykiske grunnar ikkje er i stand til å arbeida blei vedteken med Frp og H sine 19 røyster.