Thomas på landslaget

Osingen og BFG Fana-løparen Thomas Andersen har 1. og 2. plassar i alt frå 10 mil lange pulkløp til Vøringsfoss Race, Rett Vest og «Noregs hardaste» Hornindal Rundt.

Dette har landslaget for lange terrengløp lagt merke til, no er Andersen del av den 11 mann sterke troppen som skal representera Noreg under VM i Ultra terrengløp, IAU Trail World Championship, i Connemara i Irland 9. juli.

– Det er ganske utruleg at eg skal fåmenga meg med denne gjengen her, seier den ganske ferske, men råsterke terrengløparen frå Os.

4 av 11 frå Bergen

Vel, heilt utruleg er det ikkje, Thomas har slått to av dei andre landslagsutøvarane før, Ivar Haugen frå Kristiansand blei slått av Andersen i Hornindal Rundt (der Andersen vann) og Stoltzen-vinnaren Thorbjørn Ludvigsen hamna bak osingen i Rett Vest (som Thomas også vann).

– Dette blir mitt første internasjonale løp og min første tur til Irland. Eg ser veldig fram til å delta og er spent på terrenget, seier Andersen.

4 av dei 11 landslagsutøvarane i herreklassen er frå Bergen, 2 av dei trener Thomas med kvar veke.

Sjå heile troppen på kondis.no.

Historisk

I tillegg til individuell konkurranse blir det i år, for første gong, lagkonkurranse. Dei tre beste individuelle tidene frå kvar nasjon er teljande i lagkonkurransen.

Sidan dette er første gong det er lagkonkurranse er det eit historisk landslagsuttak Thomas Andersen er del av.

Fersk 3. plass på asfalt

Han liker seg best når ikkje stiane er for fine, og når løypa er ekstra lang. Likevel hamna han laurdag på 3. plass i halvmaraton i Fana og i går vann han saman med treningskameratar frå Fana stafett på Haakonsvern.

– Eg veit førebels lite om den cirka 7 mil lange løypa i Irland, men på bilde liknar terrenget litt på Hornindal Rundt, så det lover jo bra.