Vi er i gang!
Sprekere • Os mot Askøy: Kommunekampen er i gang. Delar av redaksjonen gjekk til jobb i dag, meir skal ikkje til. Kvar kilometer tel. Her får du nokre av våre turfavorittar.
Måndag morgon starta den store, spreke, kommunekampen mellom Os og Askøy. I skrivande stund (måndag ettermiddag) har Askøy sine 384 påmeldte plukka 11.003 poeng, mot våre 7.222 poeng fordelt på 357 deltakarar (1 km sykkel = 10 poeng, 1 km gange/løping = 30 poeng).
No er det berre å registrera seg og koma ut av go'stolen!
Kvar kilometer tel, så gjer som delar av Midtsiden-redaksjonen gjorde måndag morgon. Vi let bilen stå og tok beina fatt.
– No bur eg berre vel ein kilometer frå jobb, men det blei 31 poeng i Os-potten.
– Gjer alle det same, i alle fall når det er fint vêr, så plukkar vi fort poeng, seier Midtsiden sin Sprekere-ambassadør, Andris Hamre.
Turtips i Os
Lurer du på kvar du skal legga ettermiddagsturen, så har Andris samla nokre av sine favorittar i og rundt Os sentrum (kvar av turane er nærmare omtalt på Endomondo om du klikker på tur-namna).
– Vi får byrja med fjellturane. Vi bur i ei vakker bygd, kor berre fantasien set grenser for kor vi kan gå.
– Eg har plukka ut dei tre første eg høyrde om då eg kom til bygda for 15 år sidan, seier austlendingen.
- Borgafjellet frå Tøsdal (7,3 km)
- Liafjellet frå Moberg (5,2 km)
- Lyshornet frå Lyse Kloster Ruinane (5,44 km)
I tillegg tilrår Andris dei seks toppane frå Svinningen til Midtsæterfjellet som ein nydeleg dagstur om vêret held i pinsen.
– Desse turane er dessverre ikkje heilt enkle å gå om du skal ha med deg barnevogn. Hadde eg framleis hatt det behovet, så hadde nok turen inn til Raudlistova vore ein soleklar favoritt. (sjå kart her).
I flatare terreng
Midtsiden sin mann er glad i terrenget, men har òg funne fram nokre favorittar på asfalt/grus.
– Turen treng ikkje vera så lang. I ein travel kvardag er det ikkje alltid tida strekk til.
– Difor har eg òg funne fram nokre alternativ som anten går på asfalt eller grusvegar.
– Den einaste av desse som er litt kronglete no, er den som går om Nordmarka, Tøsdal og Hesteløypa då det litt oppkøyrd etter tømmerhogst i Osmarka. Eit godt alternativ kan vera å gå ut til Tøsdalskiftet og ned Osvegen. Det er ikkje så mykje lengre.
Turane har start på Os ungdomsskule eller Os sentrum.
- Borgabygdo (4,4 km)
- Lyngheim - Solstrand (2,9 km)
- Nordmarka - Tøsdal - Hesteløypa (6,2 km)
- Hegglandsdalen - Berge - Moldegaard (12,4 km)
- Strandvegen frå Oseana til Moldaneset (8,4 km)
Mens ungane er på trening
Kvifor skal berre ungane trena? Kan ikkje du ta deg ein tur mens dei er på fotball-, friidrett- eller handballbanen.
– Eg soknar jo til Os Turn og Kuventræ, så desse har alle start ved Osbadet, fortel Andris.
- Kuventrærunden (2 km)
- Rundt Ulvenvatnet (6,1 km)
- Ulvenmarsjen frå Kuventræ (10,4 km)
Midtsiden håper desse turforslaga kan inspirera osingane til å registera seg og vera med i kommunekampen mot Askøy.
Du treng ikkje gå kvar dag, eller i heile perioden (konkurransen går fram til og med 21. juni).
Kvart skritt eller tråkk på sykkelpedalen tel. Og reisar du utanbygds, så tel skritta dine like mykje der som i heimbygda.
God tur!
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.