Her skal over 500 feira 4. juli

Bildeserie:

1 av 2

– Det har vore veldig bra interesse for paraden, seier Frank Hetleflåt frå Os Amcar Club.

Saman med Er-An Veikro arrangerer klubben parade frå vegkroa på Røykenes i samband med restauranten si markering av den amerikanske nasjonaldagen. Paraden går gjennom Os til Hegglandsdalen (Lien-fabrikken) og tilbake.

– Det er over 50 bilar påmeldt og berre plass til rundt 15 til. Med gode vêrmeldingar reknar vi med smikkfull parkeringsplass med amcars, men alle må vera påmeldt for å få plass, åtvarar Linda Andersen.

– Vi har også fått med to Harley Davidson og ein diger amerikansk lastebil som blir del av paraden.

Dei som skal delta i paraden håper å sjå folk langs vegen og i Os sentrum mens dei kjører. Paraden startar på Røykenes klokka 12.12, er ved AMFI Os klokka 12.20 og held fram via Os sentrum til Hegglandsdalen og tilbake ved Amfisenteret klokka 12.45 for å parkera på Røykenes klokka 13.

På tilbakevegen vil paraden i tillegg køyra inn Brugata og gjennom sjølve sentrum før dei køyrer vidare mot Røykenes.

Med utvida parkering og skyttelbuss

På Røykenes blir det konsertar både på dagtid og kveldstid, men med parkeringsplassen fylt med amcars har Er-An Veikro fridd til gode naboar eit stykke sør på Søfteland.

– Vi har fått låna Betonggulv sin parkeringsplass. Den ligg ved fotballbanen Stilvoll nede ved Vestlandske Heiltremøblar ved avkjørsla til Gåssand.

– Dei som vil kan spasera langs vegen bort til oss mens dei ser amcar-paraden gli forbi to gongar. Men vi har vår eigen buss, Keep on rockin'-bussen, som går i gratis skytteltrafikk mellom Betonggulv og Røykenes.

Fullt telt på kveldstid - nesten fullt på dagtid

4. julifeiringa blir toppa med konsert med Lothepus, plateslepp og konsert med Mighty Magnolias og Blue Note Shuffle som siste band på scenen i eit stort partytelt som utviding på restauranten.

– Teltet tar 250 personar og konserten på kveldstid var utselt for ei god veke sidan, fortel Linda.

Men det er også konsertar og dans på dagtid. Amcarparaden er tilbake klokka 13 og 13.30 skal Eirik Søfteland synga den amerikanske nasjonalsangen.

Haavard Skaatun skal, blant anna saman med Eirik, ha konsert i teltet. Sjukdom gjer at cheerleadarane ikkje kunne stilla, men som god erstattar kjem dei tre flotte og spreke damene i Pretty Priceless for ha danseoppvising.

– Er det i det heile tatt plass til restaurantgjestar utan billett denne dagen?

– Ja, individuelle gjestar kan sjølvsagt koma, anten dei vil eta eller berre sjå på bilutstillinga. Vi har ein eigen 4. juli-meny, men som sagt, ingen parkeringsplass utanom Betonggulv sin så lenge amcar-utstillinga står her.