Tett med båtvrak på Halhjem før påske

Bildeserie:

1 av 4

Flytebrygga og den eine kaien ved Halhjem ferjekai er meint til av- og påstiging. Om du vil ligga nokre dagar, eller ei veke, må du kontakta grunneigar, som er Statens vegvesen.

Før påske i fjor låg det fire båtar ulovleg lenge ved den eine kaien. Etter at hytteeigar klagde blei alle fjerna av båteigarar, men ikkje så langt vekk. Hytteeigaren er blant dei som har bruk for kaien til å få varer i båten og ut på hytta.

Den siste tida har det lagt fleire båtar ulovleg lenge ved både kai og flytebrygge på Halhjem.

Den største, skøyta «Seibuen», blir lensa av brannvesenet ein gong i veka for at den ikkje skal gå ned. Eigar fekk i februar krav om å fjerna den.

– Treng hjelp av politiet

Rolf Nordeide hos Statens vegvesen har ansvar for ferjekaier i Hordaland. Han seier det ikkje er enkelt å få fjerna båtar som folk legg frå seg.

– Om Staten fjernar og eventuelt destruerer båtane så kan det koma erstatningskrav. Vi har hatt dialog med både kommunen, brannvesenet og politiet om saka, og treng nok hjelp av politiet om vi skal få desse vekk.

– Men no har vi vore i dialog med den eine av båtane, ein eldre turbåt med to joller. Eigar har fått lov å ligga nokre dagar til, så lenge han fjernar dei før påske.

Økonomiavdelinga tok tak

For «Seibuen», som Os brannvesen har sett seg nøydd til å lensa kvar veke for å unngå forlis og forureining, er det formelt sett enklare.

Os kommune har funne heimel og økonomiavdelinga sendte 13. februar i år brev til eigar med pålegg om fjerning av båten innan 20. februar.

Dei har funne heimel i farvannslova:

«Ingen må i farvatn etterlate fartøy slik at det kan oppstå fare, skade eller ulempe for framkommeligheten i farvatnet eller i havnen. Myndigheitene kan etter havne og farvannslova § 34 pålegge tiltak innan ein gitt frist.»

Eigar skal ikkje ha vore enkel å få tak i, men risikerer både å dekka utgifter med fjerning og å måtta betala tvangsmulkt og dom.

«Om dette ikkje blir utført kan den ansvarlige påleggas å dekke rimelige utgifter som noen har hatt til fjerning eller opprydding jf hfl § 36. Dette vedtak kan følgjast opp med forelegg som kan få verknad som rettskraftig dom eller tvangsmulkt.»

– Fleire vrak over og under vatn

Ein innbyggar i Os har sendt Midtsiden fleire bilde frå Halhjem og Hauglandssjøen (sundet innanfor).

– Gamle båtar og båtvrak har vore eit problem i dette området lenge, også i enkelte viker innanfor kaien.

Kan forureina Os' viktigaste sjøgras-område

– Nokre av båtane ligg i fjøresteinane, andre har gått ned. Det er nok berre snakk om tid før det byrjar å rusta hol i drivstofftankane på desse, seier tipsar, som ønskjer å vera anonym.

I 2015 fortalte naturfotograf Helge Haukeland, i samband med bruk av skjelsand i området, om sårbart og viktig sjøgras i Hauglandssjøen.

På éin kvadratmeter med ålegras har forskarar funne heile 290.000 små dyr.

– Ifølgje offisielle kart frå Os kommune har Hauglandssjøen den tettaste og viktigaste mengda av ålegras-enger i Os, fortalde Helge Haukeland til Midtsiden i 2015.