Desse 16 ungdomane reiser i dag heim etter 10 dagar med spelarutvikling i Alcudia. (Foto: Camp Mallorca)

10 dagar med opplevingar og kvalitet

16 ungdomar, over halvparten av dei frå Os, har deltatt på Ørjan Sandal sin Camp Mallorca.

image
image
image
image
image
image
image
image
image
Av: Kjetil Vasby Bruarøy

I april i år fortalde vi om tidlegare Lysekloster-trenar Ørjan Sandal sitt comeback til Mallorca og etablering av nytt firma, Camp Mallorca.

Ved sidan av jobb for Mallorca Toppfotball tilbyr Sandal ulike treningsleirar på den spanske ferieøya, første leir var ein treningsleir for fotballungdom i haustferien.

– Det vil bli «tidenes camp», ei oppleving for livet, både på og utanfor banen, sa Sandal i april.

I dag reiser 16 ungdomar, 10 av dei frå Os, heim etter 11 dagar (inkludert ein reisedag) på Camp Mallorca.

I Alcudia har dei hatt fem av ti treningsdagar med spelarutviklarar frå Madrid, fått grundig teoretisk undervising og, utanom banen, fått vore med på blant anna å køyra gokart, padla på SUP (stand up paddleboard), svømma i grotter og hoppa frå klipper.

Nøgd med deltakartalet

Sandal er svært nøgd med deltakartalet, 16 gutar og jenter frå 12 til 15 år.

– Vi hadde håpa på 12 til 15 deltakarar denne første campen, sjølv om vi maks hadde plass til 20. 16 deltakarar var heilt perfekt. Eg synest dessutan det er hyggeleg at vi både har mange med bakgrunn frå Os og Lysekloster, og i tillegg har nådd ut til Trøndelag, Telemark og andre klubbar i Hordaland, som Gneist, Tertnes og Norheimsund.

Dei lokale deltakarane som var på Camp Mallorca var; Knut Jordal, Mats Torp Nielsen, Scott Nord Drange, Henrik Sperrevik, Erik Fiksdal, Mathias Ørbeck, Jonas Kvam, Kristian Eidsnes, Henrik Johannessen og landslagsspelar Madelen Koldal Holme.

Familiane til 14 av 16 deltakarar har dessutan tatt haustferien på Mallorca mens ungdomen har vore på camp.

– Vi har organisert reise og opphald for desse òg. Campdeltakarane har budd for seg sjølv og halde seg på campen også utanom treningstida, mens familien har kunna koma og sjå på trening, og enkelte dagar, i korte periodar, lånt med seg fotballspelaren, for eksempel på ein middag.

Kvalitet og konsentrasjon

Sandal har leia det sportslege opplegget, og hatt med seg osingen Martin Røttingen Eidsvik ved sidan av instruktørar frå Mallorca Toppfotball.

I tillegg har han hyra inn spanske trenarar til treningsleiren. Deltakarane har blant anna fått trena tre dagar med Enric Taberner Palmer, som har erfaring frå Real Madrid sitt ungdomsakademi, og to dagar med Carlos Garcia Cuesta, som i det daglege trener 14-åringane til Atletico Madrid.

– Carlos er berre 22 år, men eit stjerneskot i Spania innan spelarutvikling. Det merkte nok både spelarane og dei som såg på øktene han hadde, kva kunnskap han sit på og korleis han snakka med ungdomen.

– I hovudsak har vi trent to økter for dagen, og i tillegg hatt individuell oppfølging, spelarsamtalar og teoretisk undervising.

– Med god, intensiv trening kan du har framgang på ti dagar, men endå betre er det om du i tillegg reiser heim med nye haldningar og betre tankar om korleis du kan utvikla deg best mogleg som fotballspelar, seier Sandal.

Tar imot heile ungdomslag

Neste camp for ungdom blir i påsken 2018.

Hausten 2018 blir det camp i begge haustferievekene, i tillegg startar Sandal med treningsleir-opplegg for heile ungdomslag, der Camp Mallorca både er vertsskap og står for det sportslege.

Fleire saker