Formann i STIL, Øyvind Skorpen, er klar for 100-årsfeiring på Søfteland i morgon. (Foto: Kjetil Osablod Grønvigh)

100 år med STIL

I morgon skal Søfteland Turn & Idrettslag feira seg sjølv - det skal gjerast i 17. mai-stil.

image
image
image
image
image
image
image
image
image
Av: Kjetil Osablod Grønvigh

– Du veit, 17. mai er jo den dagen alle på Søfteland treff kvarandre på friplassen borte ved skulen. No er vi klare for ei ny 17. mai-feiring, men denne gangen i september.

Dette fortel formann i STIL, Øyvind Skorpen.

Noko skeptisk til vêrmeldingane er Skorpen, men han seier at det blir 100-årsmarkering, same kvar vêr feiringa vert pakka inn i.  

Ville ikkje berre ha vaksenfest

I desse dagar kan STIL sjå attende på 100 år som turn- og idrettslag på Søfteland. Det heile starta som eit turnlag i 1919, men etterkvart kom fotballen på banen på 1950-talet, og med åra vart det både kappgang og anna idrett i laget. 

Skorpen fortel at laget har tenkt mykje på korleis dei første 100 åra skulle markerast.

– Det var tidleg snakk om å få publisert ei bok, men vi såg etterkvart at dette ville krevja både tid og ressursar. Vidare såg på vi på ein større korgafest i Urheim, men vi landa til slutt på ein dag for alle, og då spesielt for ungane. 

– No er programmet klart, og har du ledig tid, og gjerne ungar som treng noko å gjera, er Søfteland staden i morgon, seier ein festklar Skorpen. 

Ville ha Boy Pablo og Eirik Søfteland - fekk Glimmerskifer

Skorpen fortel at dei har vore i kontakt med både Boy Pablo, som i si tid var ein aktiv fotballspelar på Stilvoll, og Eirik Søfteland om å stå for dei kulturelle innslaga på markeringa.

– Både Boy Pablo og Søfteland var opptekne på anna hald, men løysinga låg ikkje lang unna, seier Skorpen. 

– Eg kom i snakk med Jørgen Omre Larsen borte ved musikkbingen på Søfteland. Han kunne fortelja, at saman med eit par andre tidlegara STIL-fotballspelarar, hadde han eit orkester med det fengjande namnet Glimmerskifer. Dei hadde lyst til å spela, og dette ville dei gjera gratis!

Skorpen og resten av arrangørane takka sjølvsagt ja til tilbodet, men Skorpen fortel at dei i ettertida har skjønt at Glimmerskifer er eit band av den hardare sorten.

– Eg traff nyleg Omre Larsen, og då sa han rett ut: «veit de kva de har gjort no?!»

Skorpen ser diplomatisk på heile bookinga av Glimmerskifer;

– Om det hadde vore fele eller noko anna, ville ikkje det ha fengja alle uansett. No får vi om ikkje anna eit musikalsk innslag som vil bli huska.

Helsingar og trikseshow

Skorpen fortel at morgondagens feiring vil starta med helsingar frå kommune, forbund og andre kretsar som STIL er medlem av.

– Vi køyrer ei kort offisiell opning, før vi går vidare til trikseshow med fotball-talentet Sondre Aksnes, og oppvisning i bogeskyting med Per Ivar Pahlm. Både Aksnes og Pahlm har lova å vera med vidare utover dagen slik at dei som vil kan få prøva seg. 

– STIL vil sjølv vera aktivt til stades på fribanen og visa fram ulike aktivitetar og tilbod som laget driv med, og vi har i tillegg har ordna med ei matvogn som vil selja litt ulik mat til dei som måtte bli svoltne. Kaffi og kaker spanderer STIL på publikum denne dagen. I tillegg vil Lilleballong vera til stades med ulike aktivitetar. 

Legendar vs A-lag

Etter at markeringa er ferdig på friplassen, held feiringa fram på Stilvoll.

Der skal dagens A-lag testa formen mot eit «Legende-lag», beståande av tidlegare lokale fotballheltar. 

– Vi har fått særs god respons frå tidlegare spelarar - dei fleste vil jo helst sitja på benken då, men nærare 20 har meldt seg til no. 

Og kven skal dømma kampen? Ingen ringare enn sjølvaste Davy Wathne!

Sjølve dagen blir avslutta med barnedisco i Urheim. 

Ønskjer ei framtid i Søftelandsparken

Skorpen fortel at dagens STIL kjenner på befolkningsauken i Os, og spesielt frå utbygginga i Hjellemarka. 

– Laget i dag tel om lag 350 medlemmar, kor 250 av desse er ungar. Vi er gode på breddeidretten, og tilskotet med friplassen har lagt til rette for gode aktivitetar.

– Det vi ser er utfordrande er sjølve Stilvoll-banen. Mange spelar fotball, og vi opplev ei aukande interesse for jentefotball. Det byrjar det å bli trongt på ein bane som allereie er pressa frå ulikt hald. 

– Etter storflaumen i 2005 vart banen bygd opp att, men den ligg trongt til, med E39 på den eine sida og elva på den andre. Skal ein tru klima-spådomane, vil ikkje elva og utfordringane ho gjev, bli mindre med åra. 

STIL har jobba med å realisera Søftelandsparken i ei årrekkje no. Draumen er eit nytt idrettsanlegg, med hall, i området mot Sanden. Området vart i 2010 kjøpt av Os kommune, og STIL har sjølv kosta eit innspel til reguleringsplan for det totalt 75 mål store området. 

– Planane no ligg ute til offentleg høyring, og vi håpar verkeleg at saka rekk innom kommunestyret i Os før det vert nytt kommunestyret frå nyttår av. Det er i alle fall dei signala vi har fått til no. 

• Les òg: Presenterte planar og argument for Søftlandsparken

– Vi har òg freista oss å teikna inn ein ny ungdomsskule på området, då vi veit at kommunen i desse dagar jobbar med å finna ein eigna plass til ein ny ungdomsskule i Os.

Fleire saker