100 i kø

Mange ventar på båtplass i Oselvo, i pirane som no blir rusta opp. Kva trur du ein slik plass kostar?

Kjetil Vasby Bruarøytirsdag 08. juni 2010 10:55

Nedst i Oselvo er det tre pirar med båtplassar som Os kommune leiger ut. Desse blir no rusta opp med nytt dekke, og om nokre dagar kjem ein arbeidsbåt som skal banka ned nye pælar til akterfeste.

Den harde vinteren gjorde at store delar av Oselvo var dekt med is i ein lengre periode, noko som sette fleire av pælane ut av laget.

Lågpris og rabatt
Pirane har til saman rundt 50 båtplassar. Dei som eig naust i elva har ifølgje ein gamal avtale rett på båtplass i pirane, så Os kommune har 33 plassar til utleige.

- Det kostar 4100 kroner i året å leiga plass, men vi gjev litt rabatt til nokre av dei inste plassane, for her er det berre plass til mindre båtar, fortel Ingvild Aarbakke frå økonomiavdelinga i Os kommune.

- Eg veit at det er mange som betaler godt over 10.000 kroner for båtplass andre stadar i kommunen, men det er ikkje eg som bestemmer prisen, legg ho til.

Lang kø, men litt sirkulasjon
Høgare båtar kjem seg ikkje under brua, men for mange andre er Oselvo ein draumeplass å ha båten liggande. Sentral, låst hamn med ferskvatn som renn under båtane og gjev minimalt med groe.

- Det er attraktivt, ja, vi har rundt 100 på venteliste og fleire av dei er litt utålmodige.

Folk sit på båtplassane livet ut, om dei vil, men båtplassane går berre i arv til ektefelle, ikkje til barn. Det er heller ikkje lov med framleige.

- Litt utskifting er det likevel, to nye fekk båtplass i år, 1-2 i året er ikkje uvanleg, fortel Aarbakke.