Laurdag 21. mai reiste Jon Espevik, Trygve Berentzen og Patrik Søreide til Nordkapp for å gå Noreg på langs.

I helga, etter seks veker, hadde dei lagt bak seg 100 av dei 300 mila dei skal gå.

– Det har gått overraskande bra både fysisk og mentalt, tida har gått veldig fort!

– Vi har hatt ein kviledag i Sulitjelma, men skal ut og gå 20 mil no i kveld, sa Trygve til Midtsiden laurdag ettermiddag.

Noreg på tvers (x3)

Avtanden dei har lagt bak seg tilsvarar Bergen-Oslo, to gongar.

Men gutane har òg gått Noreg på tvers, ikkje den offisielle ruta i Trøndelag, men der Noreg er på det smalaste, frå Riksgränsen til Narvik.

– Det var godt å koma ned å sjå fjorden i Narvik. No er vi, i utgangspunktet, ferdig med Sverige, det kjem litt an på korleis vi tar oss nedover Nordland.

Før dette måtte dei ta tog, ikkje for å sleppa å gå, men tur-retur for å henta post i Abisko.

Sikk-sakk nedover Nordland

Sulitjelma ligg parallelt med Bodø. Vegen vidare går gjennom Saltisen nasjonalpark, sør for denne er det mange innsjøar og fjordar og gutane får fleire omvegar å gå.

– Vi har ikkje heilt staka ut ruta, korleis vi skal gå gjennom Saltisen og forbi Saltfjellet. Men vi vil innom Umbukta Fjellstue, vi har høyrd at drivaren av denne både har gått Noreg på langs og at han er ein artig type.

Å rota vekk nøkkelen med stil

Neste depot er om cirka ei veke. Då får gutane òg tilbake nøkkelen til turisthyttene.

Trygve klarte nemleg, på imponerande vis, å senda denne nøkkelen heim (!) då dei var i Kautokeino.

– Dette blei oppdaga på dag 24, 13. juni. Eg har fått rikeleg med tyn for dette i etterkant.

Etter å ha styrt fri frå mygg mesteparten av turen fekk gutane nokre varme, tilsynelatande fine dagar, der ivrig mygg stakk gjennom ull og turgåarane måtte på med goretexjakkar i steikande sol.

– Vi gjekk meir over til turisthytter etter dette, det er óg meir sosialt utover kveldane, men måtte håpa at det var folk i hyttene for å koma oss inn.

Dei fekk låna seg ein nøkkel etter ei stund, men må senda denne tilbake når dei no får deira eigen nøkkel tilsendt frå Os.

Vil du lesa meir om turen?

• Midtsiden følgjer: Noreg til fots

• Les fyldig blogg frå turen på Norgetilfots.no