Hadde du køyrt London-Brighton i denne? (Foto: Grim Spencer Sælen Grønvigh)

115-åring stal showet

Årets utgåve av Ulven-markedet trakk mykje folk - ei raud dame frå 1904 toppa utstillinga.

image
image
image
image
image
image
image
image
image
image
image
image
image
image
image
image
Av: Kjetil Osablod Grønvigh

Gustav Bahus frå arrangøren Os Skysslag fortel at trass i ein vêrmessig grå og blaut laurdag, og fleire andre arrangement i helga, reknar arrangørane med at 5-6000 menneske tok innom marknaden. Nærare 70 utstillarar hadde teke turen for å stilla ut, selja, pruta og drøyma seg attende til svunne tider.

– Tradisjonen tru får vi hjelp av gode hjelparar, som til dømes Frode Søviknes og Terje Kvittingen. Søviknes let oss nytta ei nærliggande tomt til parkeringsplass, og dette har gjort at trafikk og parkering har glidd utan problem i heile dag. Terje Vikøyren har i tillegg, på kyndig vis, leia «kafe-jentene» våre, Wenche Hope Lepsøy, Merete Knag og Monica Flaterås.

Ei dagbok i nips og naps

Å gå rundt på Ulvenmarknaden er som å spasera seg gjennom historia; det er utruleg kva menneskeheita har produsert av nyttig- og unyttige duppedingsar.

Marknaden har mest fokus på bil og transport, men treng du ein musikkassett, ein analog telefon eller retro pynt til hytta eller man-caven din, finn du garantert dette på ein slik marknad. Kunnskapsrike seljarar kan garantert historia bak kvart einskilde objekt - og kor kjekt er det ikkje å få lov til å pruta litt i kvardagen.

3 for 2 treng ikkje bety akkurat det.

Boka om Troll

Paal Kvamme sin stand inneheld èin ting; boka om Troll-bilen.

Det som på 50-talet skulle bli Noregs nye industristoltheit, kollapsa i fire ferdige bilar. Industrieventyret frå Telemark, med direkte bensininnsprøyting og fokus på fornuft i etterkrigens rasjoneringstider er framleis litt «too soon» for enkelte å prata høgt om.

Kvamme, som er sjølv er journalist, fortel at det på høg tid «nokon endeleg tok denne historia på alvor, og skreiv ei bok om det». 

– Boka kom ut for ein månad sidan, og på eit opplag på 1000 bøker har eg allereie seld 400 av dei - er du bilentusiast bør du lesa ho, oppmodar den ferske forfattaren.

«Drømmen Om Troll» kom sjølvsagt ut på eige forlag - Fiasko forlag.

Kvamme har sjølv fått seg to turar i ein Troll-bil;

– Den første varte i 75 meter, så var det stopp. Den andre varte heile 100 meter ...

London-Brighton i bil frå 1904

Ymer Sletten stilte nok ut noko av det mest spesielle under gårsdagens marknad; ein godkjend, fullt køyrbar Cadillac, anno 1904.

For to år sidan deltok han, og vann eit klassisk billøp mellom London og Brighton med nettopp denne bilen.

– Løpet er ikkje eit løp kor du vinn med å køyra raskast, men kor jamnt du køyrer. Åå førehand fortel du kor lang tide du reknar med å bruka. Jo betre du treff, jo høgare plassering. Eg rekna, og la inn 12 miles i timen, altså om lag 20 kilometer i timen. Det synte seg å stemma temmeleg bra.

Å få eit slikt køyretøy forsikra kan by på ei og anna utfordring fortel Sletten;

– Denne bilen passar liksom ikkje heilt inn i dei digitale skjemaa forsikringsselskapa nyttar når du ringer dei i dag, så det vert litt stussing i andre enden av røyret når dei får meg på tråden. Ikkje er det heilt lett å forklara at det ikkje finnst noko elektrisk på bilen heller, men ved hjelp av fotodokumentasjon og relevante historiske fakta, er bilen no både forsikra og EU-godkjend.

Og nummerskilt? Det er snart på veg, det skal berre målast ferdig først - for hand.

Fleire saker