33 deltakarar og 6 juniorleiarar frå 14 land besøker Os og Øyane denne sommaren. I går var det bading og krabbefangst. (Foto: Kjetil Vasby Bruarøy)

14 nasjonalitetar på krabbefangst i Kobbavågen

33 elleveåringar på CISV-leir fekk ein aktivitetsdag med  

image
image
image
image
image
image
image
image
image
image
image
image
Av: Kjetil Vasby Bruarøy

Etter ankomst fredag og ei helg hos vertsfamiliar blei dei 33 unge deltakarane på årets CISV-leir i Os samla der dei no skal bu i 28 dagar; Søre Øyane barneskule.

Allereie på dag tre fekk dei ein aktivitet med lokal snert; bading i fjorden og krabbefangst i fjøra.

– Vi fekk spørsmål frå Fjordfolk og stiller på dugnad, seier Hugo Hansen frå Bjørnafjorden Opplevelser. 

Selskapet, som har base i Øyane, stilte med badevaktar, diplom, krabbestampar og litt snacks til grillen.

Frå India til «arctic dip» i Bjørnafjorden

Etter å ha marsjert frå skulen på Sundøy til Kobbavågen på Røtinga fekk deltakarane som ønskte ta seg ein dukkert. Dei som bada fekk diplom merkt med det noko geografisk ukorrekte omgrepet «Arctic dip».

– Rundt halvparten av ungane tok seg ein dukkert. Gruppa frå India var først uti og bada lengst, fortel leiar for leiren, Rommel Santos frå øynasjonen Filippinane. 

Namn eller bilde av enkeltdeltakarar skal ikkje i media, men vi fekk ein prat med gruppa frå India.

– Vi kjem frå innlandet i India, og bur ved ei elv, men den er så skiten at vi ikkje har lov å bada i den. Men det er andre elver i området vi kan bada i, og eg har sjølv bada i sjøen på ferie på Maldivene, fortel ein av dei.

– Det er klart vi ville gripa sjansen då vi fekk lov å bada her, sjølv om det var kaldt. Vi mista nesten kjensla i beina våre etter ei stund, men det var berre gøy.

Krabbefangst og arbeid for fred

Saman med dei 33 deltakarane følgjer 6 juniorleiarar i 16-17-årsalderen. 

Deltakarane er frå 14 ulike nasjonar; Noreg, Danmark, Tyskland, Frankrike, Italia, Hellas, USA, Costa Rica, Mexico, Brasil, India, Indonesia, Filippinane og Thailand.

Mens halvparten bada engasjerte alle seg i krabbeleiting. Så var det bålkos og grilling.

– Leiren held fram med ulike aktivitetar, vi har ein «ladder of learning», med fire nivå.

CISV jobbar for internasjonalt venskap med fokus på fredsskapande arbeid.

Dei fire nivåa i stigen er:
• Å bli kjent med kvarandre
• Samarbeid
• Kommunikasjon
• Simulasjon (rollespel)

– På alle nivå har vi aktivitetar som verktøy til å læra, fortel Santos. 

Fleire saker