Rune og Eirik Walle under årets Baronsfestival - ein festival i rekordvarme og med rekordmange gjestar. (Foto: Kjetil Osablod Grønvigh)

16 år med musikalsk hagefest

På laurdag gjekk årets Baronsfestival av stabelen - kva er det som får Eirik og Rune Walle til å invitera foreldra sin hage full i gjestar?!

image
image
image
image
image
image
image
image
image
image
image
image
image
image
image
Av: Kjetil Osablod Grønvigh

Det heile starta i samband med Rune sin 30-årsdag i 2002. Eirik ville gjera stas på storebroren, hadde tilgong på stillas (til å byggja scene med), musikalske vener og ein hage foreldra, Otto og Sølvi Walle, sa det var greitt å halda ein liten fest i.

Etter det vart konklusjonen enkel: Kvifor ikkje berre halda fram med dette?

Med unnatak av eitt år kor Eirik studerte i Singapore, og det ikkje vart festival, og i fjor då Eirik vart far, (då vart festivalen enkelt og greitt, med Eirik si kone si velsigning, flytta til ei helg seinare), har det vore fast rutine med Baronsfestival siste helga i juli.

Ein møtestad og ein veners-veners-veners fest

– Baronsfestivalen er, og har alltid vore eitt privat arrangement, fortel Eirik, men satt litt på spissen er vi den lengstlevande musikkfestivalen i Os. Både Osøren Jazz & Bluesfestival og Rock 'n' LOL på Søfteland kom og gjekk, men vi held framleis på.

Rune fortel at det aldri har vore planar om å gjera festivalen kommersiell;

– Vi ser på dette som ein fin, årleg tradisjon, kor vi samlar vener og kjende, og ikkje minst opplev nye spanade artistar. Med jamne mellomrom har vi òg fått besøk av meir etablerte artistar som har høyrt at dette er ein kjekk plass å spela. Musikarar snakkar jo saman dei òg, så det hender at musikarar og band regelrett inviterer seg sjølv til å spela hos oss.

Skal vera ein scene for dei unge og håpefulle

Spesielt Eirik er oppteken av å gje unge artistar moglegheiten til å få spela på Baronsfestivalen;

– Ingenting gjer meg meir glad enn å sjå kjemien mellom ein ung, ukjend artist som gjev publikum fulltenning. Dette har vi opplevd fleire gongar opp gjennom åra - det er jo litt stas at vi hadde Aurora på scenen vår berre nokre månadar før ho gjekk vidare og la verda for sine føter.

Ein del artistar er òg å rekna som fast inventar på Baronsfestivalen. Red Hot Cherry Poppers har til dømes spelt på festivalen kvart einaste år sidan 2002. 

– Like sikkert som at det vert Baronsfestival, har det no blitt tradisjon det at det lokale Red Hot Chili Peppers-tributebandet avsluttar festivalen, seier Eirik.

– Dei har hatt litt varierande speletid fra år til år, alt etter kor mykje speletid banda før har nytta seg av, men det er alltid tid til litt Cherrypoppers på tampen av kvelden.

Politi på hagevandring

– Men heilt seriøst; høglytt fest, midt i Os sentrum - det burde jo vera ein invitasjon til naboklagar og usemje med politiet?

Vi har alltid lagt opp til ein god tone med både politi og naboar, seier Rune. Politiet er varsla i god tid på førehand, dei veit kva Baronsfestivalen inneber, og at vi alltid rundar live-musikken ved midnatt. Dette gjer at politiet kan svara på eventuelle klagar utan å måtte ana kor tid det vert stilt. Dette samarbeidet har fungert smertefritt i ei årrekkje no.

– Men kva med ubudne gjestar då, festivalen ligg jo noko sentralt til?

Eirik og Rune ser på kvarandre.

– Har vi eigentleg måtte kasta ut nokon, undrar Rune seg?

– Ein og annan som har forvilla seg inn har vel hendt, men det har aldri vore noko tull her, legg Eirik til.

Men kva må til for bli invitert på Baronsfestivalen - må du senda inn søknad?

Det er jo ein veners-veners-veners fest, og vi ser jo helst at du har fått ein invitasjon. Men om du helsar fint på i døra og oppfører deg fint, så er du vel på mange måtar velkomen, seier Rune.

Årets festival trakk nærare 150 menneske, og meldingane skal ha det til at ikkje ein einaste blom eller prydbusk vart skada.

Politiet var innom og helste på like etter midnatt, berre for å sjekka at alt gjekk bra, og då fekk dei like så godt ei synfaring i hagen av mor og far, seier Eirik og ler høgt.


Fleire saker