16-åring tatt med promille
Politiet stoppa ein ung syndar i trafikken natt til søndag. Dei fekk også melding om knust rute på AMFI Os.
Natt til søndag i 1.30-tida blei ein mopedist kontrollert i Os sentrum.
– Det var tilfeldig at vi møtte og kontrollerte vedkomande, fortel politibetjent Kenneth Rastad.
Føraren, ein 16 år gamal gut, hadde førarkort på moped. Men det var noko anna som ikkje stemt.
– Han var rusa og innrømte å ha drukke alkohol, fortel Rastad, som tok ungdomen med til legevakt for sjekk og blodprøvetaking.
Foreldra blei varsla og politiet tok naturlegvis beslag i førarkortet.
Ruteknusing og bråk
Politiet har også fått melding om ruteknusing.
– Nokre ungdomar skal stå bak ruteknusing på lageret til Elkjøp. Vi fekk ikkje tak i dei.
Utanfor Irish Cat var det ein episode som for politiet framstår som noko uklar.
– Nokre gjestar sa dei vil klaga på vaktane til politiet. Vi får sjå kva dei har å seia om dei følgjer opp saka.