250 åttandeklassingar på veg til fjells

Bildeserie:

1 av 5

Etter fridagen i går var åttandeklassingane frå Nore Neset ungdomsskule og Os ungdomsskule samla i Os onsdag morgon.

Den nasjonale turdagen for 8. klassingane i Noreg, DNT si skulesatsing Opptur, har i Os felles avmarsj for dei to ungdomsskulane, frå skulen via Nordmarka og Tøsdal til Borgafjellet 353 moh.

– Det er 13. året vi har Opptur i Os. Mykje har endra seg desse åra, seier John Lunde frå Os Turlag.

Han har vore med kvart år som ein av dei rundt 20 frå Os Turlag som arrangerer og står vakt ute i løypa.

– Det første året gjekk turen til Møsnuken. Då sleit vi ut ein del ungdomar, minnest han med eit smil.

– Det er heldigvis mange som blir tatt med på tur i barndomen, men ikkje alle. Nokre har sin første tur på Borgafjellet denne dagen. Men ungdomane stiller betre kledd og med betre sko no enn før. Og humøret er på topp, det var i alle fall ingen klaging i fjor.

Løypa og premiane

Løypa går frå Os ungdomskule til Nordmarka, Tøsdal, opp Tøsdalsskaret, til Grytestølen, vidare til Borgafjellet og ned ura tilbake til skulen. Løypa er cirka 10 km, og har ulike postar der elevane stemplar seg inn og svarer på spørsmål.

– Alle som har alt rett er med i trekninga av nokre fine premiar, éin per skule.

– Men det er òg 14 andre premiar som blir trekte på startnummer, og alle deltakarane får tskjorte.

Det er vaktar fra Os Turlag plassert rundt om i løypa, i tillegg til merkeband som er hengt opp, slik at det skal være lett å finna rett sti. Helse-elevar frå Os vgs er òg på plass, og skal hjelpa om nokon får bruk for det.

– Vi er glade for at vêret er fint, og vi håper elevane får ein fin aktivitetsdag i naturen, ein dag som kan inspirera ungdomen til også å ta seg nokre turar på eigahand.