Lokal | 11. jan. 2016

26 leilegheiter i Baronsgården

Leilegheiter i 2. til 5. etasje. Næring i 1. etasje. Dei omarbeidde planane for Baronsgården er no sendt kommunen.

26 leilegheiter i Baronsgården
Slik vil Baronsgården sjå ut om planane til OBEAS går igjennom (ill: OBEAS)
Andris Hamremandag 11. jan. 2016 10:35

I 2013 kjøpte Os bygg og eigedom (OBEAS) Oshjørnet frå Bb Eiendom Invest I KS (BBEI) som eit ledd i å rusta opp Osøyro og å skapa meir liv på Øyro.

Eigedomsutviklarane i OBEAS har etter det gått fleire runder og testa marknaden både blant potensielle kundar og entreprenørar for å gjera jobben.

– No har vi omarbeidd heile prosjektet og teikna det heilt på nytt. Vi har vore ei prosjekteringsgruppe på ni personar på det meste, fortel prosjektleiar Paal Herland i OBEAS.

Auka éin etasje

Baronsgården-prosjektet består no av det gamle Oshjørnet med fire etasjar og eit nybygg på fem etasjar, der kor Os Open og Strikkebutikken held hus i dag.

– Vi har auka prosjektet med ein etasje. På det gamle Oshjørnet riv vi taket og lagar ein tilbaketrekt 4. etasje. I nybygget held vi oss til sentrumsplanen og søkjer om fem etasjar som den opnar for, forklarar Herland.

To- og treroms leilegheter

Totalt gjer det at ein får 26 leilegheiter frå 2. etasje og oppover.

– Det blir to- og treroms leilegheiter, kor den minste er på 53 kvadratmeter, tolv av dei er toroms på rundt 60 kvadratmeter medan den største blir i femte etasjen i nybygget og blir ei treromsleilegheit på 89,9 kvadratmeter.

Utfordrande grunn

Herland fortel at dei i prosessen har fått gjennomført grunnmålingar og analyser som viser at det er ein utfordrande grunn å byggja på.

– Det eksisterande bygget står fundamentert som det gjer. Det betyr mellomanna at vi har måtte kutta ein etasje med næring slik at det no berre er første høgda det blir næring i. Bygget tålte rett og slett ikkje to etasjar med næring.

– Når det gjeld det nye bygget så må vi der pela oss ned på fast grunn. Målingane syner at vi må ned på 25-30 meter for å treffe fjell. Dette er nok den største utfordringa i sjølve prosjektet. Vi skal pela fundamenta for nybygget, samstundes som vi ikkje skal påføra det eksisterande bygget skader. For å sikra dette har vi i målehola satt ut apparat som skal overvake det heile ved å måla trykket i grunnen, forklarar Herland.

Har løyst utfordringane

Herland fortel òg at det har vore ei utfordring å løyse branntekniske krav og krav til universell utforming i det eksisterande bygget som skal rehabiliterast.

– Det er eit gamalt bygg, men vi føler oss trygge på at vi har klart å løyse det meste no. Fire av dei 26 leilegheitane vil ikkje få universell utforming, men for dei 22 andre har vi klart å løysa det.

Håper på oppstart til sommaren

Sjølv om det har tatt lang tid frå OBEAS kjøpte eigedommen i 2013 føler Herland seg no trygg på at ein har klart å få til eit prosjekt som lar seg gjennomføra.

– Vi vel no å gå på ei delt entreprise kor alle dei forskjellige arbeida blir eigne prosjekt. Forhåpentlegvis gjer det at også mindre, lokale entreprenørar vil vera med og rekne pris på det.

– Vi har vel sagt at den som får tømrar-entreprisen skal vera dei som får ein koordinerande funksjon. I tillegg vil vi ta mykje av prosjektleiinga sjølv.

– Framdriftsplanen er at vi går ut med ei kunngjering no i midten av januar, så held vi ei tilbodskonferanse i februar og får til ei kontrahering i mars/april. Går det som vi håper kan vi komma igang med arbeida i mai/juni, avsluttar prosjektleiaren.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.