3. plass i NM

I helga har osingane Markus Slettebakken og Freddy Haugan deltatt i senior-NM i vassjet.

Årets noregsmeisterskap blei arrangert under Drammen Elvefestival.

– Racet gjekk i elva og det var masse publikum, så det var ekstra kjekt, seier Markus.

Han er litt skuffa over at han ikkje tok medalje i lite-klassen, der måtte han nøya seg med 4. plass. Men i sprint (1,5 runde) gjekk det litt betre.

Ikkje overraskande var det Ronny «Smurfen» Mangerud som stakk av med sigeren.

Også Stian Schjetlein blei for rask, men Slettebakken tar med seg ein fin bronsemedalje heim til Os.

Kameraten Freddy Haugan gjekk det ikkje like bra med. Han var uheldig og slo seg. Haugan blei frakta vekk på båre og var til lege for sjekk, men skal ha kome tilbake til arenaen og berre vore lettare skadd.