30 bedrifter samla om eitt kort
– På høg tid at vi fekk felles gåvekort igjen.
Leiar i Os Sentrumsforening, Jeanett Borgen Kallekleiv, gler seg over at ho i dag kan lansera gåvekort for medlemsbedriftene.
– Eg etterlyste det då eg sjølv dreiv butikk i sentrum, heldigvis gjorde både William Lindborg og styreleiar Jon Sivert Rykkel eit stykke arbeid med å få det i gang igjen.
Då ho på seinsommaren overtok som sentrumsleiar trengte ho nesten berre å trykka på bestillingsknappen.
– Det mange år sidan sentrumsgåvekortet sist var i sving. Eg veit ikkje kvifor det stoppa opp den gong, men no var det på tide å få dette tilbodet tilbake.
«Alle» er med - men førebels berre éin utsalsstad
Jeanett fortel at gåvekortet frå i dag kan brukast 26 stadar i Os sentrum, og 2-3 andre bedrifter ser òg ut til å bli med.
– Både motebutikkar, serveringsstadar, daglegvare, velvære og frisørar er med, det er òg Oseana.
– Dei fleste har jo hatt sine eigne gåvekort å by på, men ikkje alle har hatt digiale kort, og det er uansett ikkje det same med individuelle sal. Då eg nyleg skulle i bursdagsfest til ei som hadde rund dag, og ho ønskte gåvekort i 4-5 butikkar i sentrum, var det lett for at det blei skeivfordeling på gåvebordet.
Gåvekortet blir i starten selt berre hos dyrebutikken Max, som er blant dei med best opningstid i sentrum, men fleire utsalsstadar skal koma.