30 timar utan straum og vatn

Bildeserie:

1 av 3

3.500 hus i Os, over halvparten av bustadane i kommunen, mista straumen i uvêret i går. Mange har fått straumen tilbake, men framleis er det 1.200 utan.

– Vi har folk ute i alle sonar og kjem til å halda fram utover natta. Men det er grenser for kor lenge vi har lov å lata mannskapet jobba samanhengande, så enkelte må nok klara seg til i morgon utan straum, seier Anne Mette Tuvin frå BKK Nett.

Desse områda er framleis utan straum:
• Hegglandsdalen: 460 hus
• Hagavik/Strøno: 346
• Lepsøy: 183
• Søfteland: 169
• Avgang Granlia (feil på transformator Søvikvåg): 455

– Luranetunet lånte aggregat frå oss i går. Det henta vi i formiddag, då hadde dei fått straumen tilbake, seier varabrannsjef Arne Monsen.

Kysthospitalet i Hagavik og Ravneberghaugen skal ha eigne aggregat. Minst eitt av hotella i Os har også vore utan straum.

Midtsiden har ikkje lykkast i å nå teknisk vakt i Os kommune for status på skular og barnehagar.

Utan straum og vatn på Hjelle

Då straumen gjekk på Hjelle i 12-tida i går forsvann også trykket i pumpa som pressar vatnet opp i bustadfeltet i fjellsida på Borgafjellet.

– Vår prioritet i dag har vore å få vatn til husstandane, seier Monsen.

Os brannvesen er på plassen med tankbil, som har kopla seg på leidningsnettet og kjører kommunalt vatn innom bilen og opp i feltet.

– Trykket er lågt øvst i feltet, men no får dei i det minste vatn.

Bilen har vore bemanna med firetimarsvakter i ettermiddag og kjem til å forsyna feltet med vatn til rundt klokka 23 i kveld.

BKK må vaska ein brytar

BKK Nett er på plass med montørar i området og har no plassert eit aggregat ved Hegglandsdalsvegen, rett innanfor Borgafjell Barnehage.

– Vi er nødt til det. Linjene er fullstendig herpa, fortel montør Stig Dahle.

BKK Nett har blant anna brukt helikopter for å fjerna tre som låg over linjene mot Hegglandsdalen. Dei velta stolpane i Finnebrekka er forbigått og kopla om.

Detaljar om kven som får straum frå aggregatet har Dahle ikkje, men det kjem truleg til å levera straum til andre enn Hjelle.

– Vi prøvde å kopla inn Hjelle to gongar, men gneistrane rann nedover stolpen. Det viste seg at ein brytar var full av salt etter stormen, så no er den til vask.

– Vi får kanskje kopla inn Hjelle i kveld, når nyvaska brytar er på plass.

Tore Valvik rømte hus

Ein av dei som bur på Hjelle, som flykta heim til foreldra, er Tore Valvik.

– Det går fint å klara seg ei stund utan straum, men når du også mister vatnet er det gale.

Foreldra bur i nærleiken, i Hesthaugen, der straumen kom tilbake i 19.30-tida laurdag.

– Det har vore ei flott helg på alle måtar, seier United-supportaren ironisk.

Han fekk ikkje noko å gleda seg over på pappa sin TV søndag ettermiddag heller.