Egil Thuen (t.h.), her i kamp for Os 2 mot Søre Neset i 2012, leikar seg i 6. divisjon. (Arkivfoto: KVB)

6 mål av Egil Thuen

Etter uavgjort i andre runde har Søre Neset tre sigrar på rad. Søndag lagde Egil Thuen vestkystsalat av Vestkysten.

Av: Kjetil Vasby Bruarøy

Søre Neset starta serien med 1-2-tap for Eikelandsfjorden på heimebane før dei spelte 2-2 borte mot Sædalen.

Så vann dei 6-3 borte over Øystese 2 og 4-1 heime over Rosendal.

Søndag var det bortekamp mot Vestkysten, og då blei det endå meir målrikt.

Vestkysten - Søre Neset 0-8 
Målskårarar: Egil Thuen 6, Thomas Lindborg 2.

– Egil har skåra ein del til no i sesongen, men søndag sprudla han skikkeleg. Det var ikkje berre det at han skåra mange mål, det var måten han gjorde det på, seier trenar Kenneth Svenningsen.

– Han sprang forbi alt og alle og klinte ballen i kryssen. Det var gøy å sjå på! Egil overhøyrde også at vi, etter at han hadde skåra fire mål, diskuterte om andre spelarar skulle få sleppa til.

– Då kom han bort til oss og ba om å få spela meir, «la meg no få spela når eg har det så gøy», sa han.

Lagkameraten sette inn 1-0 og 3-0, alle dei 6 andre måla var det unge Thuen som skåra.

– Han sprang faktisk av seg sko-solen, men let seg ikkje stoppa av den grunn. Det var berre å ropa til Kenneth Hufthammer å få slengt inn ein reservesko, så han kunne skåra eitt mål til.

 

Fleire saker