Næringsliv | 29. feb. 2012

65-åring i ny drakt

Lundehjørnet feirar 65 år med ny salong inspirert av dei store i utlandet. - Det er liv laga, seier Kåre Lunde.

65-åring i ny drakt
Kåre Lunde nyt ein av dei nye massasjestolane saman med Kari Rekkum (foto: Andris Hamre)
Andris Hamreonsdag 29. feb. 2012 11:02

I byrjinga av januar opna salongen på hjørnet av Øyro og Byvegen opp at etter ei større ombygging og med nytt namn.

- Vi gjekk frå Lundehjørnet frisør og parfymeri til Lundehjørnet frisør og velvære for å få betre fram kva vi driv med, seier eigar Kåre Lunde.

Inspirasjonen til den nye salongen har han og dagleg leiar Kari Rekkum henta frå reiser i inn- og utland, der dei har studert trendar og trekk i bransjen.

- Ute i Europa ser vi at dei opnar opp salongane mykje meir ut mot gata slik at forbipasserande kan sjå medan kundane får behandling.

- Vi trur vel ikkje nordmenn er like glade i å sitja på utstilling, så vi har dempa akkurat den biten noko, men opent, lyst og trivelig har det blitt, synes Lunde medan han viser Midtsiden rundt i den nye salongen.

Ei av endringane dei har gjort er å krympa arealet til parfymeriet.

- Vi har trappa litt ned på parfymeribiten, men har halde på sortimentet frå SanSoucis, skyt Kari Rekkum inn.

65 år i faget

Vegen fram til dagens salong har vore lang, og med mykje løye.

- Far min tok over som frisør på Fagerthun-hjørnet i 1946.

- I 1967 kjøpte han gamle hotel Prinsen og starta bygginga av det kvartalet du ser her no. Hausten '68 flytta salongen inn her etter å ha vore nokre år i 2. høgda på torget, over der Libris ligg i dag, forklarar frisøren.

Dei første åra gjekk salongen over to etasjar med dameavdeling i andreetasje og herreavdeling med parfymeri på gateplan.

- Den gongen var det jo slik at det var menn som klipte menn og damer som klipte damer.

- Då vi i '86 slo dei to avdelingane saman og bygde om her nede var det ein del som reagerte på at dei fekk ein frisør av det motsette kjønn. Det var ikkje berre berre, men det gjekk seg til, smiler Lunde.

Bak forehenget

Sjølv om klipp for begge kjønn blei flytta ned på same plan var det ikkje alt som kunne foregå i det opne rom.

- Du veit, det var ingen som farga håret på den tida. I alle fall ikkje så naboen skulle veta om.

- Derfor måtte vi ha eit eige fargekabinett med forheng slik at ingen kunne sjå om nokon fekk farga manken, seier Kari.

I dag fortel dei to frisørane om farging av håret over ein lav sko.

- På 80-talet var permanent det store. No har vel farging tatt over mykje av den omsetnaden permanenten sto for.

Med eigne massasjestolar

Etter 25 år utan ombygging fann dei to ut at det var på tide å ta større grep.

- Vi har jo pussa opp i løpet av dei 25 åra, men det blei etterkvart litt for gamaldags og upraktisk, forklarer Rekkum.

Sjølv om talet kvadratmeter har gått litt ned opplever dei to at dei har fått ein mykje meir praktisk salong.

- Mellom anna har vi fått plass til ei eige velværeavdeling med vaskar og massasjestolar så kundene kan få litt meir enn berre ein hårvask eller ny farge, seier Lunde medan han ber Midtsiden setja seg ned og testa dei nye stolane.

Pyntar 20 bruder i året

Lundehjørnet har kunder frå 2 til 92 år, likevel er det ei gruppe det er litt ekstra stas med.

- Vi har alltid vore populære blant bruder.

- Også tidlegare har vi hatt eit rom der ho kunne kle seg, men det var litt lite og trangt.

- No har vi fått på plass eit eige bruderom kor brura både kan friserast, sminkast og kle seg.

- I tillegg kan vi bruka rommet om vi har andre som ønskjer å vera litt meir skjerma, for eksempel om dei skal ta hol i øyre eller få lagt makeup før ein bytur, forklarar Kari Rekkum.

Lært opp halv bygda

I mange av dei 65 åra har Lundehjørnet vore ei lærebedrift.

- Vi har alltid hatt 3-4 i lære kvart år. Du kan vel nesten seie at vi har lært opp halve bygda, og Bergen med, i frisørfaget.

I bedrifta jobbar det no om lag 10 tilsette, mange av dei med over 20 års fartstid.

- For oss har det alltid vore viktig at dei tilsette har det bra, at dei får vera med på å påverka arbeidsdagen og at dei får sine rettar. Derfor har vi alltid kjørt striks på å vera ei tariffbedrift med AFP, OTP, HMS og bedriftshelseteneste, forklarar Lunde.

Har tru på sentrum

Samtalen med dei to dreier etterkvart over utviklinga på Osøyro. Etter så mange år i sentrum har dei sett butikkar og bedriftar koma og gå.

- Hadde ikkje vi hatt tru på sentrum så hadde vi aldri gjort det løftet vi no har tatt.

- Vi er overbevist om at det er liv laga, avsluttar dei to.

Spennande? Vil du ha ukas høgdepunkt i innboksen?

Hald deg oppdatert med Midtsiden

Få tilgang til alt innhald frå Midtsiden-redaksjonen. Som abonnent hjelper du oss på veg til å kunna dekka endå meir av det som skjer i Os!

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.