Sport | 29. juli 2012

9 frå Os i rekordcup i Oslo

I dag startar fotballturneringa Norway Cup, for 40. gong, med over 1600 lag, 9 av dei med spelarar frå Os kommune.

9 frå Os i rekordcup i Oslo
Os j14 er først ut blant laga frå Os, her under oppvarming før kamp mot Lena klokka 10 søndag. (mobilfoto: KVB)
Kjetil Vasby Bruarøy
Kjetil Vasby Bruarøysundag 29. juli 2012 08:21

På ein søkkvåt laurdag blei det i går arrangert parade og opningskonsert, med blant anna Vinnie og Madcon på scenen. I dag startar dei innleiande rundane i årets Norway Cup.

Bækkelagets Sportsklub har arrangert Norway Cup kvart år sidan starten i 1972, med unntak av 1976, då klubben valte Oslo Cup i handball i staden.

Rekord for verdas største

Til saman har det vore over 830.000 deltakarar i cupen desse 40 åra, noko som gjer Norway Cup til verdas største fotballturnering.

I år er deltakartalet høgare enn nokosinne, med 1.610 lag med til saman 32.200 deltakarar frå 10 til 19 år, frå 60 ulike nasjonar.

Det skal fram til finalane laurdag 4. august bli spelt 4.200 kampar på 71 banar i og rundt Oslo.

6 + 3 lag frå Os

Frå Osbygda stiller Os Turnforening med gutar 19 (junior), tre lag i gutar 16, eitt i gutar 14 og eitt i jenter 14.

I tillegg er Søfteland turn og idrettslag på plass, i samarbeid med Kalandseid il, med tre KIL/STIL-lag, gutar 13, jenter 13 og jenter 16.

Frå regn til sol

Midtsiden er i Oslo under turneringa og kjem tilbake med resultat og rapportar etterkvart som laga har kome eit stykke i dei innleiande rundane.

Søndag er fleire av kampane som skulle gått på Ekeberg flytta til reservebanar for at dei våte banane skal få tørka, men det er meldt sol og opphaldsvêr søndag og måndag, så det ligg likevel an til å bli ein fin start på turneringa.

Spennande? Vil du ha ukas høgdepunkt i innboksen?

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.