ABO vann Lyseparken

I byrjinga av mai blei det kjend at tre arkitektfirma var vald ut til å teikna konseptskisser for korleis Lyseparken kan utviklast for framtida.

Tysdag fekk formannskapet presentert dei tre utkasta frå avtroppande utviklingsdirektør Cato Zachrisen.

– Det har vore eit parallelloppdrag, kor vi no har plukka ut ein vinnar, men kor vi kan ta med oss element frå dei to andre òg.

– Etter å ha vurdert dei tre bidraga landa vi ned på at vi vil jobba vidare med Os-baserte ABO plan og arkitektur, fortalde Zachrisen.

– Det er veldig gledeleg. No sprett det nok ei ekstra champagnekork på sommarfesten vår hos Oddvar Lyssand fredag, smiler dagleg leiar i ABO, Lars Christensen.

Dei to som ikkje rakk opp var bergenskontoret til Asplan Viak og Oslobaserte MAD.

Tre forskjellige angrepsvinklar

Zachrisen fortalde at dei tre arkitektfirma alle hadde levert spennande tankar for Lyseparken.

– Vi fekk det vi håpte på, nemleg tre vidt forskjellege måtar å angripa oppdraget på.

– Dette gjer at porsjektstyret har mange gode tankar òg idear å jobba vidare med.

Gjorde lokalkunnskapen utslaget?

Ei gruppe blei sett saman for å vurdera dei tre bidraga.

– Etter gruppa si vurdering leverte ABO best på godt tilrettelagt handelsområde, fleksibilitet i høve å kunna utvikla området i faser, og med ei god lokal tilpassing.

– Kanskje var det lokalkunnskapen som gjorde at dei løyste den siste delen best, smilte Zachrisen.

Dei tre framlegga strekte seg frå 500 til 570 000 kvaderatmeter med næringsareal.

Berre starten

Konseptskissene er utgangspunkt for det vidare arbeidet med å raffinera planane og etterkvart utarbeida detaljregulering for Lyseparken.

– Det er ikkje nødvendigvis slik som skissene viser det blir, det kan koma mange endringar når ein ser på dei einskilde løysingane og kva som er mogleg.

– Dette er berre starten, avslutta Zachrisen.