midtsiden

Action i Øygarden

VILT, VAKKERT OG VÅTT: Rapport frå «Sommar i Os» sin MOT-tur til Øygarden.

image
image
image
image
image
Av: Kjetil Vasby Bruarøy

Vêret viste seg ikkje frå si beste side (som vanleg), men kva gjorde vel det når ein hadde å gjere med slike positive og aktive ungdomar på tur – MOT tur til Øygarden 27.-29. juni.

Underteikna frykta det verste då 25 ungdomar inkl. meg sjølv sat i bussen som skulle frakta oss til Toftøy i Øygarden måndag morgon. To døgn i grisevêr, kor i all verda skulle dette gå? Dei fleste var allereie våte berre av å gå frå far/mor sine bilar og inn i bussen.

Frykta viste seg å vera grunnlaus!

Om lag éin time etter avgang var vi framme. Meininga var å liggja i lavvo i villmarksleiren der ute, men på grunn av store nedbørsmengder valte vi å trekkja innandørs. Med romsleg plass, godt utstyrt kjøken, ulike spel, flatskjerm, dvd filmar og Wii/playstation var det få klager å høyra. Til og med ein dusj var det der. Frå den trygge og tørre basen vart det delt opp i grupper og aktivitetane kunne byrja.

Først var det lunsj i villmarksleiren. Dei måtte sjølv finna seg pinne for å spidda pølser. Ingen pinne, ingen pølser! Alle vart mette!

Aktivitetane i villmarkleiren: Pil og boge, vikingøksekasting, skyting med luftpistol, vedstabling (høgast mogleg på kort tid) og gruppeoppgåve – eller ”teamwork” som det kan kallast på godt nynorsk.

Neste og siste post på programmet om måndagen var zip-line eller taubane om ein vil. 20 meter over bakken suste dei av garde om lag 200 meter.

For fleire av desse ungdomane var dette skummelt – dei meistra noko dei ikkje trudde dei kom til å gjere.

Våte som kråker var det  godt å koma innom hus og få skifta klede og få i seg middagsmat. Gryterett med rundstykke og raud sukkerfri saft. Det var nokon som ikkje orka mat, dei hadde fortært chips, brus og sjokolade i store mengder og i eit imponerande raskt tempo. Det var lov å ha med seg digg på turen, men mange hadde med rasjonar for vekesvis.

Det kunne nesten sjå ut som om at enkelte hadde tenkt meir på salt- og søtsaker enn på å ha tilstrekkeleg med klede med seg.

Vel, etter middagen såg nokre på film, andre spelte Wii/playstation, somme høyrde på musikk medan andre berre preika og spelte ”umoderne” spel. Kanskje nokon flørta til og med, men gutane var i stort fleirtal. Halve moroa er jo å vera seint oppe og syta for at leiarane får lite med søvn. Det greidde dei fint. Det skal leggjast til at dei fekk god hjelp av torevêr den første natta.     

Etter frukost tysdag morgon, var det ”på an igjen”; Paintball og fisking ut i havgapet.

Gjengen fekk skyta på kvarandre i ufarlege og kontrollerte former, sjølv om kanskje nokre fekk seg ein blåveis eller to i låret. Moro for store og små! Medan den eine gjengen var på paintball, var den andre på fisketur. Dei bytta halvvegs.

Fisken beit sånn måteleg for dei fleste, men for Mariell Flaterås Mikkelsen vart det nok ei spesiell oppleving. Ho fekk 6 fine paler (sei) på eit og same kast. På alle seks krokane hang det fisk.

Det er vel det ein kallar fiskelukke! Nokre torskar vart òg drege opp. Fisk til middag var det likevel ikkje den store stemninga for, så det vart karbonadar og potetstappe i staden. Som førre kveld var det film, musikk og speling utover. Dei sovna tidlegare denne natta. To dagar med aktivitetar og rangling hadde teke på.

Om onsdagen stod berre frukost og rydding på programmet. Ingenting låg att! Må seia at eg var mektig imponert over desse ungdomane. Ikkje nokon klaga på vêret! Det hadde neppe skjedd om ein hadde reist med 24 vaksne. Dei storkosa seg! Heilt til slutt ynskjer eg å retta ein stor takk til Klyva som laga eit innhaldsrikt og profesjonelt opplegg for oss!

Reidar Dale, MOT-koordinator, Oppvekst og kultur 

Fleire saker