Oppe f.v.: Kristin Lunde, Andreas Søfteland, Tore Sælen og Steinar Størkson. (Foto/arkivfoto: Privat/Kjetil Vasby Bruarøy frå Langedalen Opp i 2017 og 2018) 

Alle gjorde det bra - utanom han beste

Skåla Opp: Andreas Søfteland stivna på halvvegen, men Kristin Lunde vann klassen sin og dei andre frå Opptur persa med mange minutt.

Av: Kjetil Vasby Bruarøy

Skåla er reikna som Norges høgaste fjelltopp som har foten i sjøen. Laurdag var det tid for La Sportiva Skåla Opp, eit motbakkeløp frå havskorpa til 1.848 meters høgde.

Løpet var Andreas Søfteland sitt hovudmål for årets sesong, men han reiste skuffa heim igjen etter å ha landa på 35. plass.

– Eg låg rundt 20. plass til vi var halvvegs. Det kjentes lett ut, og dei rundt meg pusta tyngre enn meg, så eg trudde at det skulle gå veldig bra. Men så blei alt frykteleg tungt, fortel Andreas.

Han blei forbipassert av deltakar etter deltakar, men kom i mål som beste frå Os på 1.28,46, sju plassar framfor Geir S. Skaten.

– Eg er skuffa fordi eg trudde eg endeleg skulle slå bestenoteringa mi frå 2012. I 2017 hadde eg eit fall, tidlegare år eg vore hindra av skade eller deltatt i løp som har hatt navkorta løype grunna vêr. Men det gjekk ikkje i år heller. Hadde eg visst at dagsformen ikkje var god så hadde eg opna mindre hardt. 

Fleire oppturar likevel

Søfteland er skuffa over eige resultat, men fekk opp humøret då han såg kor bra det gjekk med dei andre deltakarne frå Opptur Motbakkeklubb.

Steinar Størkson (2.00,48) persa med 8 minutt, Tore Sælen (1.56,58) med 16 minutt, Stig Sivertsen (1.40,07) med 20 minutt og Kristin Lunde (1.49,04) vann klassen sin!

– Dette er spesielt sterkt med tanke på forholda. Det var kaldt og fleire som fekk krampe av folk som ikkje plar slita med krampe, fortel Søfteland.

Sjølv skal han no nullstilla seg, trena og testa formen opp Stoltzekleiven, for å sjå om han har noko i Stoltzen-løpet å gjera seinare i haust.

Vinnarane

Stian Angermund-Vik vann Skåla Opp på tida 1.09,56, Stian Øvergaard Aarvik frå Gneist, som jobbar på Sport Norge på AMFI Os, kom på 2. plass med tida 1.11,30.

Karoline Hansen Kyte var raskaste kvinne uansett alder, ho kom i mål på 1.23,27.

• Komplett resultatliste på eqtiming.no

 

Fleire saker