Amerikanske tilstandar

I haustferien gjentar Linda Andersen suksessen frå i fjor og inviterer til drive-in-kino. Tysdag til torsdag kan alle som har bil (med radio) koma og få med seg filmklassikarane Footloose og Cannonball Run. Lyden frå filmane får ein inn i bilen gjennom FM-bandet.

Linda har og skaffa seg 5-års kinoløyve og har lov å visa eldre filmar som ikkje konkurrerer med andre kinoar.

– Eg trur ikkje det er så mange kafear som kan skilta med det.

Utfordra av vinden

Føribuingane har vore alt anna enn enkle. Måndag då alt skulle riggast opp fekk dei ein utfordring det var vanskeleg å forutsjå.

– Vi fekk ei enorm utfordring, nemlig vinden som dukka opp på vêrmeldinga natt til måndag, fortel Linda.

Linda, som har kontakta Meteorologisk Institutt fleire gongar om dagen, fann ut at det skulle gå bra å montera lerretet med dei vindkasta som var meldt.

– Men måndagskveld, då vi var ferdig med all rigginga og sat inne og åt, så kom det vindkast som var langt over det som var målt, og lerretet blåste ned.

Alt måtte pakkast saman, og Linda frykta at heile arrangementet måtte avlysast.

– Men då eg vakna opp i dag og det var vindstille så tenkte eg berre: Yes!

Skuffa over Amcar-oppmøtet

Etter ein hektisk dag, med springing heilt fram til filmstart, var det endeleg klart for første filmframsyning.

Første kinokvelden har Linda prioritert Amcar-klubbane som er ivrige brukarar av vegkroa.

– Eg må nok sei at eg er litt skuffa over at ikkje fleire av dei har møtt opp, dei har vore i meg mange gongar sidan sist om at vi må få ny drive-in-kino.

Rundt 15 bilar blei varta opp av servitørar kledd opp i ekte amerikansk retrostil, og som gjekk rundt og serverte både popkorn og anna snacks gjennom bilvindauget.

– Heilt konge

Anita Langenes og Johnny Lillefosse som er medlem i Amcar-klubbane både på Os og Askøy, og møtte opp i Johnny sin Cadillac frå 1966.

– Vi var her i fjor også og synest det er heilt konge å koma her og "leika Amerika", seier Anita.

Sissel Kallekleiv Folkmann og ektemannen Morten er ikkje medlemmar av nokon klubb, men tok turen med sin nyinnkjøpte Corvette -84.

– Eg leste om det på Facebook og fann ut at dette måtte vi prøva.

– Det er jo så gøy!

Linda håper at fleire tar turen dei neste dagane, for sjølv om ho ikkje gjer dette for å tjena seg rik, så er eit arrangement som dette ikkje billig å få til.

– Men eg kjem nok til å gjera det igjen, det er jo så gøy!

– Sjå, tenk at vi er på Røykenes no, seier ho entusiastisk og ser utover plassen med (amerikanske) stjerner i augo.