Anne Kat går solo igjen
I går besøkte Ylvis Oseana, siste dagen i februar kjem ein av dei største kvinnlege komikarane til kulturhuset i Os.
Har du vore inne på billettservice for å kjøpa billettar til show i Oseana har du kanksje sett at Anne-Kat Hærland er på veg, men først no slepp Oseana nyhenda "offisielt".
- Anne Kat legg no ut turnéplanen så vi vil ikkje prøva å spara lenger på denne overraskinga, seier marknadssjef i Oseana, Astrid Heggland, til Midtsiden.
Fire år etter at Anne Kat hadde premiere på "Gift, men ingen fanatiker" er den folkekjære artisten tilbake med eit heilt nytt soloshow.
Råare, frekkare, ærlegare
Ifølgje Anne Kat sjølv skal det vera endå råare, endå frekkare og endå meir ærleg enn dei førre showa.
- Eg er så lei av godt vaksne new-age fanatikarar som via kvinnekanalen Fem snakkar om å finna nirvana. Herregud, ta ein titt på dei, dei klarar jo ikkje å finna ein skikkeleg frisør ein gong, smell det frå Hærland.
- Eg er så lei av unge metroseksuelle menn som flyr vestkanten rundt i champange-rus med buddhistiske symbol dinglande rundt handledda, kort beskjed til dykk: Ereksjon reknast ikkje som personleg vekst, slår den hardtslåande kvinna fast.
Anne Kat kjem til Oseana 28. februar 2013.