Annika til UKM-finale

Juryen som har vurdert dei forskjellige bidraga under fylkesmønstringa til UKM på UFS Verftet i helga har no kome fram til kven dei sender vidare til landsmønstringa i Trondheim 19.-23. juni.

– Os vert representert i kategorien kunst, ved Annika Svendal Os (17), med biletet «Aurora».

– Ho gjekk faktisk vidare til Trondheim i fjor og, så her må me berre bøya oss i støvet for hennar kreativitet og leveringsevne!, seier ein entusiastisk kulturkonsulent i Os kommune, Kjetil Osablod Grønvigh.

Kan koma vidare

I tillegg til Annika Svendal Os er Lovise Meltzer Rygh (17) nominert vidare i kategorien «Nettredaksjon».

– Ho er no med i ein nominasjonsprosess, og me har stor tru på at ho skal få representera Os òg.

– Her ventar me ei avgjersle innan ei vekes tid, fortel Osablod Grønvigh.

Ingen frå Fusa

Fusa gjekk dessverre ikkje vidare med nokon innslag i år.

– Med lokalmønstringa friskt i minne, kor me vart presentert det eine flotte innslaget etter det andre, fortel vel dette noko om kor høgt nivået var på fylkesmønstringa i år.

– Både Os og Fusa leverer store sceneopplevingar og flott kunst kvart år, så det berre til å bretta opp ermane eit hakk til, og koma seg i øvingslokala og ateliea att, avsluttar kulturkonsulenten.