Dei siste 12 månadane har det blitt levert i snitt meir enn éin båt i veka hos Bir i Kolskogen. (Foto: Kjetil Vasby Bruarøy)

To år med vrakpant på båt

Ingen leverer fleire båtar per innbyggar enn Os. 

image
image
Av: Kjetil Vasby Bruarøy

I desember 2016 kom regjeringa med forslag om vrakpant på båt, i oktober 2017 tredde ordninga i kraft.

Vrakpantordninga gjeld båtar inntil 15 fot (4,57 meter) og gir deg 1000 kroner i pant.

Ordninga gjeld òg kajakkar, kanoar, surfebrett og gummibåtar med kjøl.

– Vi har hatt ein som spurde om han kunne kjøpa gummibåt på tilbud hos Jula, for eit par hundre kroner, og få 1000 kroner i pant. Gummibåten var rigga for påhengsmotor, men hadde ikkje kjøl, så denne måtte vi avslå, fortel Tina Skudal hos Bir.

Ei auke i Os 

Denne veka blei ein rapport levert frå Bir til Miljødepartementet med tal for to første år.

Rapporten gjeld frå 1. november 2017 til 31. oktober 2018 og tilsvarande periode frå 2018 til 2019.

– Her ser vi at mengda innleverte båtar til gjenvinningsstasjonen i Kolskogen i Os har auka frå 36 det første året til 56 dei siste 12 månadane.

Bir har til saman 11 gjenvinningsstasjonar i 9 kommunar. Dei har tatt imot til saman 318 båtvrak, 92 av dei levert i Os.

Os var på 4. plass i mengda innleverte båtar dei første 12 månadane. Espehaugen, Askøy og Kvam hadde fleire.

Dei siste 12 månadane er det berre Birs største stasjon, på Espehaugen, som har tatt imot fleire båtvrak.

Kolskogen har tatt imot 56, Espehaugen 60. 

Kjem med ønskje om å overta båtane 

Det er Miljødirektoratet si ordning, og det er dei som betaler ut pant, Bir er berre eit mottak.

For å levera til panteordninga skal det fyllast ut eit skjema. Dette blir stempla av Bir og skal leggast ved søknad om pant.

– Dei som stiller opp med båt, utan skjema, har vi prøvd å hjelpa. Men det skal fyllast ut før dei kjem til stasjonen, elles kan det gå mykje tid som eigentleg skulle vore brukt på å hjelpa andre, og bil med hengar kan i mellomtida bli ståande å sperra for resten av trafikken.

Skudal fortel at Bir innimellom får spørsmål frå folk som ser båtane, og ønskjer å overta dei.

– Vi forstår at folk som ønskjer seg båt, og som er i stand til å pussa desse opp, er interesserte i å ta dei med seg. Men vi har ikkje mandat til å dela desse ut.

– Ordninga er for båtar som ikkje lenger er brukande, målet er jo å få rydda vekk gamle båtvrak, anten dei er bygd i tre, plast eller gummi.

Ferdig ribba

Båtane skal òg vera sanert før du kjem til stasjonen.

– Litt av årsaka til at ordninga gjeld mindre båtar er at desse sjeldan har innanbordsmotor eller rattkonsoll. Motor, metall, puter og kalesje skal vekk før båten blir levert.

miljodirektoratet.no kan du lesa meir om ordninga og lasta ned skjema.

Fleire saker