Årets første og årets «Oskar»

Etter ei opning utan fangst natt til fredag har vassføringa auka og mykje stor laks gått opp i nedste del av Oselvo.

• Les òg: Daniel (14) tok fri frå skulen for å fiska

Klokka 15.50 fredag tok Bård Lyssand sesongens første laks. Laksen, som vog 5,0 kilo, blei tatt på makk i Kvernhushølen (frå austbreidden i sone 2).

Ole Vidar Søviknes, som med Prohd.no følgjer fisket i Oselvo tett, filma landinga av den første laksen.

SJÅ VIDEO NEDST I ARTIKKELEN

– Eg har aldri sett så mykje laks i Oselvo på éin gong, seier Ole Vidar, som òg har filma laksen vaka i hamna og gå opp fossen frå sone 2.

Eit halv døgn seinare tok Johnny Lund årets «Oskar», altså første laks tatt av medlem i Os Jakt og Fiskelag.

– Heldt på å forsova meg

Også Johnny sin Oskar blei tatt i sone 2. Først fekk han ein på 6,1 kilo på sluk, så ein på 5,9 kilo.

– Eg hadde fiska på ettermiddagen og gjekk heim for å kvila meg litt, sidan eg hadde kort frå midnatt igjen. Så søv eg litt for lenge og kom meg ikkje i elva før rundt klokka 4, fortel Johnny til Midtsiden.

Kameraten Rolf Aspenes sat oppe i fossen og høyrde ikkje at Johnny ropte for å få hjelp.

– Eg sleppte fisken ut eit stykke, men så såg eg at alle tre krokane på sluken sat fast i fisken, så då køyrde eg han litt hardare og fekk han på land utan håv, fortel Johnny.

Sist han tok årets Oskar var i 2014. Då tok han òg den største, eit beist på 14,3 kilo.

• Følg fisket i Oselvo på Prohd.no

Sjå video av Bård Lyssand som fiskar årets første - og av laksen på veg opp elva.