Årets «Oskar» blei tatt av Remi Bårtvedt, vog 5,0 kilo og blei tatt på spinner i sone 2 måndag 27. juni (kl 18.20). (Foto: Kjetil V. Bruarøy/privat)

Årets «Oskar» til Remi Bårtvedt

– Det berre rann på med laks, fortel Remi, som i går fekk prisen som er oppkalla etter bestefaren hans.

Av: Kjetil Vasby Bruarøy

Det tok ei veke etter sesongopninga i Oselvo før årets første laks blei tatt i Oselvo, onsdag 22. juni fekk Kjell Morten Søvik ein fisk på 3,1 kilo.

Dette var ikkje årets «Oskar», for den blir delt ut av Os Jakt og Fiskelag til årets første tatt av medlem av laget. Prisen skal vera kalla opp etter Oskar Bårtvedt, som i si tid «alltid» fekk først og mest i Oselvo.

Oskar hadde ofte med seg barnebarnet Remi, som i vaksen alder har tatt opp igjen elvefiske som hobby. Remi fekk ikkje fisk på opningsnatta, men no har det kome meir vatn i elva og i går fekk han det rett og slett hektisk.

– Det berre rann på med fisk, på ein kort tur ned til hytta for å henta spinner kom det 20 laks på éin gong, fortel Remi.

Han var tilbake i sone 2 i går og klokka 18.20 fekk han ein laks på 5,0 kilo tatt på spinner. Klokka 19.10 fekk han ein laks på 3,5 kilo med makk og reke på kroken.

– No er det berre til å gjera seg ferdig på jobb i ein fei, eg har kort i sone 5 i kveld. Eg vil tru at også dei som har fiskekort på formiddagen i dag får bra med fisk.

Moberg fekk laks på 6,1 kilo

Remi tok makstalet på to laks på under ein time i går.

– Eg tok ein tur langs elva etterpå, og der hadde Tore Engelsen Moberg tatt ein laks på 6,1 kilo.

Også denne blei tatt i sone 2. Sjå bilde og følg fisket frå dag til dag på prohd.no.

– Han får vanlegvis større laks enn meg, så alt er ved normalen, seier Remi og ler.

– Men eg tok den første, legg han til.

Leiar for fiskeutvalet i Os JFL, Anders Kloven, stadfestar at Remi sin fangst er årets «Oskar».

– Vi har ikkje høyrd om medlemmar som har rapportert inn fangst av laks før Bårtvedt, seier Kloven, og gratulerer!

Meir vatn i vente

Oselvo har lite å henta på snøsmelting og fisket er svært avhengig av nedbør for å få god nok vassføring.

Vassføringa er aukande etter ein svært tørr juni, (sjå målar på Røykenes) og det er meldt store nedbørsmengder frå torsdag og gjennom helga.

Sjå vêrmelding for Osøyro, frå Yr og Storm side om side, på pent.no.

Midtsiden samleside: Jakt og fiske