Ariel Braathen, her i Osbadet i 2015, tar pause frå toppidretten på ubestemt tid. (Foto: Kjetil Vasby Bruarøy)

Ariel Braathen tar pause frå svømming

Stortalentet frå Søfteland reiste heim midt i NM. Ho veit ikkje kor lenge ho blir vekke frå toppidretten.

Av: Kjetil Vasby Bruarøy

Ariel Braathen, som fyller 19 år i mai, var i 2016 nær på å kvalifisera seg til OL i Rio.

– Eg svømmer fort nok på trening, men får det ikkje til på stemne, sa Ariel til Midtsiden etter at ho missa i siste kvalifiseringsforsøk.

I forkant hadde ho klart alle delmål og låg «framfor budsjett» i forhold til planen ho la i 2013.

Ariel hevda seg både nasjonalt og internasjonalt, vann NM senior som 15-åring, tok 5 gull og sette 2 noregsrekordar som 16-åring, blei nordisk meister i junior og kom til finalen i European Games i Baku.

Øvde inn ny frekvens

Etter at det blei klart at ho ikkje fekk delta i OL i Rio, og OL i Tokyo i 2020 blei nytt mål, byrja ho å øva inn ny teknikk. Målet var å bruka 2/3 så mange svømmetak per distanse.

– Om eg skal koma vidare internasjonalt så må eg øva inn ny teknikk på alle distansar. Det blir som gir på ein sykkel, det er tungt å auka frå 2. gir til 4. gir i starten, men farten blir høgare når du byrjar å få det til, forklarte ho til Midtsiden etter at ho i 2017 ikkje kom på pallen i NM.

I trening tangerte ho eigen pers med frekvens på 40 (40 svømmetak i minuttet), mens ho tidlegare svømte med frekvens på 60.

– Det blir som gir på ein sykkel, det er tungt å auka frå 2. gir til 4. gir i starten, men farten blir høgare når du byrjar å få det til. I innsvømminga i dag hadde eg gode tider med 40 frekvens, eg svømte oppmot eigen pers med 2/3 så mange svømmetak, men i forsøk og finalar så synda eg litt og auka frekvensen.

– Dette gidd eg ikkje meir

I helga fortalte Bergensavisen at Ariel ikkje blir å sjå under Bergen Swim Festival, og at Ariel har tatt pause på ubestemt tid.

Det heile starta i kortbane NM 17. mars.

– Då var det nok. Eg svømte dårleg, og då tenkte eg ««ok, dette gidd eg ikkje meir», fortel Ariel til BA.no.

Braathen skulle svømt finale og stafett, men reiste rett heim.

Ho seier ho gret ein del etterpå. Ikkje for at ho angra, men fordi det var eit tungt val.

Les heile intervjuet på BA.no.

Fleire saker