Arne Monsen fekk blomar og vin frå arbeidsgjevar, representert ved ordførar Terje Søviknes, på ein blålys-fest i Ulvehiet fredag. (Privat foto)

Arne Monsen blei hylla for 50 (!) år i teneste

– Ein heidersmann og stor lokalpatriot, seier ordførar Terje Søviknes om avtroppande varabrannsjef.

Av: Kjetil Vasby Bruarøy

Då blålysetatane hadde sommarfest i Os jakt- og fiskelag sitt klubbhus «Ulvehiet» fredag, svingte ordførar Terje Søviknes innom for å gjera stas på ein av festdeltakarane.

Varabrannsjef Arne Monsen skulle gått av med pensjon i vår, men står i jobben fram til september. Han har då jobba i 49 år i Os kommune, nær nok til å bli heidra som ein 50-årsjubilant.

Legg vi til litt velvilje var han i brannvesenet også då han avtente førstegangsteneste, på Haakonsvern, han har dermed ikkje kasta vekk mykje tid i løpet av denne mannsalderen for same arbeidsgjevar.

– Det kom brått på! Eg hadde vorspiel før festen og hadde til og med kanskje tatt ein litt rolegare start på kvelden om eg hadde visst at eg skulle få denne forma for merksemd, seier Monsen og ler.

Starta som 16-åring

Monsen fekk blomar, vin og fine ord. Han har tidlegare vore heidra av KS for si lange og trufaste teneste for Os kommune. Han gjekk rett frå ungdomsskulen i jobb for teknisk eining i 1970, og etter halvanna år blei han oppmoda å søkja læreplass i brannvesenet som feiar.

I februar fylte han 65 år, og trivst like godt i jobben.

– Har du aldri vore nær på å skifta beite?

– Nei! Eg har alltid likt meg godt i jobben. Hovudårsaka er kollegaene og det fine miljøet oss imellom.

Brannsjef Stein Gjøsund var vekkreist fredag, men seier veteranen Arne har utvikla seg fagleg også alle desse siste åra.

– Eg trur nok det å ha fleire unge kollegaer har vore til hjelp, då held du deg litt yngre sjølv òg, forklarer Arne.

– Ein stor lokalpatriot

Søviknes la vekt på det faglege i sin tale til Monsen, samtidig som han sette ting i perspektiv.

– Eg spurde forsamlinga på Ulven om dei visste kor mange innbyggarar Os kommune hadde då Arne blei tilsett. Svaret var 8.006, Arne var den einaste som visste det.

– Brann og redning har vore gjennom ei enorm utvkling i løpet av dei tiåra Arne har vore tilsett, frå utstyr til metodar og fasilitetar. Arne har vore med på litt av ei reise, og vore veldig engasjert, også politisk og i lobbyverksemd, for fleire saker.

Ordføraren nemner det at Os, som første frivillige brannvesen i Noreg, fekk eige korps med redningsdykkarar, som éi av sakene.

– No, på tampen av karriera hans, er ein annan visjon i ferd med å realiserast; ei samling av blålyseiningar på Moberg. 

Ny politistasjon får byggestart til hausten.

– Å ha ein tilsett ståande i så mange år kan vera eit stort fortrinn for eit firma eller ein organisasjon som Os kommune. Spesielt når det er ein mann som Arne. Han har sete på stor kompetanse og kjenner bygda godt, og han har vist seg som ein samfunnsengasjert mann og ein stor lokalpatriot.

I 2014 reiste han til Oslo for å sjå ny E39 mellom Os og Bergen bli klubba gjennom, året etter fekk han med seg byggestarten. 

 

Fleire saker