Årseth har selt Kulur-kjeda

Kulur, som i Os helst er kjent som barnehagen i Kuvågen, er ein kjede av sju barnehagar. Ekteparet Rolf og Synnøve Årseth har kjøpt éin og bygd seks av dei sju, som ligg i Volda, Ålesund, Oslo, Bergen og i Os i Hordaland.

No har Årseth selt Kulur til Læringsverkstedet.

Eit vegskilje

– Vi har, etter å ha tenkt på dette over lang tid, bestemt oss for å overlevera stafettpinnen til ein kjent og mykje større større barnehageaktør. Vi føler at vi har kome til ei vegskilje i liva våre, etter å ha jobba dedikert i ei årrekkje med å bygga opp ein av Noregs mest spennande barnehagekjedar, seier Rolf og Synnøve Årseth.

Kulur har fokus på å læra ungane å ta omsyn til andre, på samhald og samspel, på friluftsliv og estetiske fag, blant anna ved hjelp av sanserom.

Les òg: Bestilte Mæland-flodhest på 200 kilo

– Vårt val om å selja til nettopp Læringsverkstedet er tufta på at vi føler dei var mest riktig for Kulur blant aktørane som eig og driv barnehagar i Noreg.

Audmjuke og stolte

Læringsverkstedet er ein av Noregs største og raskast veksande private barnehageaktørar og den einaste nasjonale private kjeden kor begge eigarane er pedagogar (ekteparet Randi og Hans Jacob Sundby).

Læringsverkstedet har over 170 barnehagar og over 4000 tilsette. Hovudkontoret er på Jessheim nær Gardermoen flyplass.

– Kulur er ein profesjonell aktør med mykje erfaring og kompetanse som vi gler oss til å få med på laget!

– Dei har flotte barnehagebygg og kompetente medarbeidarar. Vi er svært audmjuke og, ikkje minst, stolte over å kunna seia «Velkommen til Læringsverkstedets fellesskap!» til ein solid og kvalitetsbevisst kjede! seier eigarane av Læringsverkstedet, Randi og Hans Jacob Sundby.