Børge Lunde leverte meir enn det som var bestilt i kommunestyremøtet i går. (Kommune-TV/William Lindborg)
Børge Lunde leverte meir enn det som var bestilt i kommunestyremøtet i går. (Kommune-TV/William Lindborg)

– Artig sak

Blei irettesett av ordførar etter gitarspeling i kommunestyremøte.

Kjetil Vasby Bruarøy
19. februar 2021 - 11:35

I går var årets første møte i Bjørnafjorden kommunestyre. Møtet blei gjennomført på Teams, og under behandling av nye barnehagevedtekter, mens kommunestyremedlem Atle Kvåle (Ap) heldt innlegg, tok Børge Lunde (H) opp ein gitar som han klimpra på.

Lunde hadde ikkje skrudd av lyden på eigen mikrofon, dermed fekk Kvåle eit akkompagnement.

– Eg vil be representanten Børge Lunde visa respekt for kommunestyret og slutta å spela gitar, eventuelt skru av mikrofonen, sa ordførar Trine Lindborg (Ap).

– Den un-muta seg sjølv, svara Børge, og avslutta gitarspelinga.

– Hjelper meg å halda fokus

I dag gir Lunde uttrykk for at han synest episoden var litt pinleg. 

– Vanlegvis sit eg og teiknar og skriblar litt i løpet av møtet, for å halda konsentrasjonen oppe. I går blei det litt klimpring innimellom, men eg lytta til alt som blei sagt, og det var aldri meininga å støyta nokon! understreker han.

Politiske møte kan bli langvarige, etter gode 5 timar var dei i går på sak 7 av 18 på lista.

– Kanskje er det fleire som driv med ting ved sidan av?

– Det skal ikkje eg uttala meg om, men gitarspeling skal ikkje gjenta seg.

Rektoren veit godt at læremetodar er individuelle, og det hender i dagens skule at elevar får lytta til musikk mens dei driv med skulearbeid. Noko dei ville blitt straffa for om vi går nokre få tiår tilbake.

– Likevel, eg ser at dette kanskje blei upassande, og går no tilbake til å teikna.

Han synest ikkje det er lett å seia kva han er best til, å spela gitar eller teikna. 

Men kommunestyret kan vera glad for at Lunde ikkje spelte hovudinstrumentet sitt i møtet (var trommespelar i band i ungdomen).

Atle Kvåle: – Artig sak

Politikarkollegaen som hadde ordet då gitaren gjekk over lydanlegget til dei 35 kommunestyremedlemmane, Atle Kvåle (Ap), seier han lurte på kvar lyden kom frå.

– «Kva er dette for noko?» tenkte eg.

– Det var greit av ordførar å avbryta han, ho har ein krevjande jobb med å leia møtet, og i går brukte vi dessutan ny teknologi for avstemming.

– Men sjølv blei eg slett ikkje fornærma! Eg har stor respekt for Børge Lunde, han er ein kjekk og dyktig kar, og folk må halda på med kva dei vil så lenge dei følgjer med på møtet.

– Det er bra at folk har kamera på, så vi i det minste får sjå kvarandre i desse pandemi-tider. Men gitar med lyd blei kanskje i overkant, sjølv om eg òg har spelt til dans i gamledagar, seier Atle og ler.

Ordførar seier ho ikkje har annan kommentar enn det ho sa i møtet i går.

– Kommunestyret er kommunen sitt øvste styringsorgan, og vi har vårt reglement å følgja, anten møtet er i kommunestyresalen, i Oseana eller på video, seier Lindborg til Midtsiden.

Ein annan partikollega av Kvåle og ordførar har delt klippet i sosiale media.

«Når spillestedene må stenge ned, dukker dessverre trubadurene opp i kommunestyremøter. Gjenåpne kulturlivet nå!» skriv kommunestyrerepresentant og tidlegare rockefestivalarrangør William Lindborg. 

Les meir om

Politikk Musikk