Askefaste osingar

I går blei luftrommet over heile Noreg for første gong i historia stengt. Også i store delar av Europa er det full stopp.

- Eg kom fra TV-messe i Cannes til Amsterdam i går, med fly klokka 7 om morgonen frå Nice. Men på Schiphol var det full stopp, fortel Kristian Bruarøy.

Bruarøy, som jobbar i TV 2, var for tredje gong jurymedlem i den prestisjetunge International Interactive Emmy Awards, som blir delt ut under messa.

Alle er hjelpsame
Bruarøy fortel at det i starten var lite informasjon å få, og at han i starten fekk hotell og booka om flyet til i dag.

- Heldigvis har folk frå alle nasjonar vore veldig hjelpsame med kvarandre. Reisande utvekslar tips om alt mogleg, kva båtar som har ledig plass og kva reiseruter dei trur er lure å ta.

No sit Kristian på tog på veg til Kiel. Han har høyrt at båten til Oslo er fullbooka, men vil prøva å få plass likevel. Alternativet er båt frå København til Gøteborg, der han allereie har sikra seg plass.

- Å koma til Oslo i morgon passar bra, eg skal på jubileumsfest der på laurdag uansett.

Viktig bagasje
Sjølv om han no er i rørsle, er ikkje alt som det skal vera. Dei som har reist med fly som har mellomlanda har ikkje fått ut bagasjen sin, noko som har vore eit alvorleg problem for fleire av dei Kristian har snakka med.

- Folk får ikkje ut bagasjen sin, til og med ikkje dei som har medisinar, viktige dokument eller nøklar til hus eller bil dei vil ha med seg vidare. Det har skapt mykje irritasjon.

Kom frå Korea onsdag
Blant andre osingar som sit askefast er sjømann Helge Røttingen.

- Eg mønstra av i Korea og skulle fly via Munchen, men Munchen blei onsdag siste stopp, fortel Helge, som jobbar på den norskeigde lastebåten Tern Arrow.

No tar han tog til Hamburg og vidare til København, der han har ordna seg med haik via Gøteborg til Oslo. I Oslo står ein privatbil han skal låna for å koma seg heim.

Keys ventar i Amsterdam
Kommunestyrepresentant Torill Keys (Ap) og sambuaren Dan-Jarle Køhler Raustein er framleis i Amsterdam. Dei reiste frå New Dehli i India onsdag klokka 21.30 (norsk tid) og landa på Schiphol i Amsterdam 5.40 natt til torsdag. Flyet vidare til Flesland skulle gått klokka 7.40.

- Vi prøvde å booka om og det blei mykje kø og venting. Vi fekk booka om fleire gongar, men flya blei som kjent kansellerert gong på gong, seier Raustein til Midtsiden.no.

Dei to kontakta både forsikringsselskap og KLM fleire gongar, utan å få klare svar på korleis dei skulle ordna seg med hotell og alternativ reiserute.

- Det blei eit kappløp om å skaffa seg rom, men vi klarte heldigvis å få plass på eit fint hotell i Amsterdam sentrum. No har vi handla klede og tannkost, så blir det berre til å venta og sjå kva som skjer.

- Amsterdam er ein fin by, så vi overlever. No må berre islendingane setja ein propp i vulkanen sin, så får vi i aust blåsa det vi kan vestover så ordnar det seg nok, seier ein munter Dan-Jarle.

Ifølgje VG.no kan flyforbodet i Europa vara i 48 timar til.