Audun sitt siste eventyr

Noreg-Shetland i 12 fot: – Eg er glad det gjekk fint.

Audun heime i Kuvågen med sambuar Lina. – Planen var ein segltur, men eg er framleis lei av å vera i båt. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytirsdag 13. juli 2021 13:48

Tysdag i førre veke, etter 55 timar utan søvn og utan å eta, kom Audun Nordhus i mål på Lerwick etter å ha segla 200 nautiske mil frå Marstein.

I omtalen av ankomsten fortalte vi at turen hadde gått fint, men at han ikkje fekk framdrift over Bressay East Ground, og derfor måtte få slep av følgjebåten.

Midtsiden rettar: At han måtte venda seg til følgjebåten for støtte formulerte vi ganske klumsete «kvila seg på følgjebåten», sjølv om vi visste Audun aldri var om bord. Vi ber om orsak.

– Eg var heldig med vindretningen heile turen, men her var det så kraftig motstraum at eg fekk null framdrift. I tillegg kom bølgjene inn frå sida, så eg klarte ikkje å halda stabil kurs. «Har du ikkje kompass» spurde Roy Hansen i følgjebåten. Det hadde eg sjølvsagt, men forholda var umoglege for ein så liten båt, forklarer Audun, som fekk slep i 30 nautiske mil.

Stabil og uredd

Nordhus har bak seg eit mislykka forsøk på å ro til Shetland i oselvar i 1996, ei vellykka reise som første i verda til å ro rundt Kapp Horn i Sør-Amerika i 2006 og eit mislykka forsøk på å ro over Beringstredet i 2009.

– Det var høga bølgjer på veg til Shetland denne gong òg, men eg hadde bygd båten stabil, kjølen åleine var nok nærmare 70 kilo. Eg var aldri redd for å velta.

Nordsjøen 1996: Etter tre døgn fann Kystvakten oselvaren opp-ned. To døgn seinare fann dei redningsflåten.

– Kor tid har du vore mest redd? Då du i 1996 låg fem døgn på ein redningsflåte i Nordsjøen, då du rodde i høge bølgjer rundt Kapp Horn eller då du kasta deg uti sjøen utanfor Alaska?

– Eg var litt redd då lufta byrja å gå ut av redningsflåten i 1996, men eg var mest redd då eg måtte kasta meg i sjøen i Beringstredet i 2009. Det var kaldt, og eg frykta at redningsaksjonen kunne ta tid.

– Turen rundt Kapp Horn gjekk smertefritt. Det var kraftig vind og høge bølgjer, men om du ror frå vest mot aust så ror du medstraums. Eg brukte berre 3 timar på dei 9 nautiske mila.

Bildeserie:

Turen rundt Kapp Horn gjekk i oselvar med høge riper. Også då med følgjebåt.
Audun brukte berre tre timar på å ro dei ni nautiske mila rundt Kapp Horn.
Turen rundt Kapp Horn gjekk i oselvar med høge riper. Også då med følgjebåt.
Audun brukte berre tre timar på å ro dei ni nautiske mila rundt Kapp Horn.
1 av 2
Audun brukte berre tre timar på å ro dei ni nautiske mila rundt Kapp Horn.
Turen rundt Kapp Horn gjekk i oselvar med høge riper. Også då med følgjebåt.

– Kvar kjem eventyrlysta frå?

– Den kom nok i ung alder. Eg fekk ein robåt av far min då eg var 12 år. Mens dei var på hyttetur på Fjelberg skulle bestemor passa meg heime i Kråkevik. Men eg hadde laga segl av plast, så eg segla over til hytta, og kom søkkvåt i land. Hadde det skjedd i dag, så hadde nok nokon ringt politiet.

Justerte ferieplanar

Audun fylte 64 år i januar, og har pensjonert seg etter 43 år i Nordsjøen.

– Eg hadde ikkje fått lov av ungane mine eller sambuar å legga frå land utan følgjebåt. Dette var det siste eventyret.

– Du ville gi vekk båten din på Shetland. Var det nokon som ville ha den?

– Ja, det var ein som ville ta av hytta og bruka den som hagebåt. Eg ba han planta eit norsk flagg om bord. Eg kunne fått den heim med ein fiskebåt til hausten, men der og då var eg lei. Eg angrar litt no, men samtidig er det greit å sleppa å ausa på den her heime.

– Så no blir det å slappa av med ein roleg ferie i den større seglbåten din?

– Det var planen, men eg er framleis så lei av å vera i båt at vi venter med det. I første omgang blir det ein tur til huset eg har på Stord, og så til Litauen, der Lina kjem frå. Vi liker oss godt der, og no er det endeleg grønt lys for å reisa.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.