Aurora nominert til P3 Gull
Laurdag 29. november arrangerer NRK P3 årets P3 Gull i Telenor Arena. Blant dei nominerte: Aurora Aksnes.
Aurora Aksnes har i 2014 fått ei kometkarriere, noko som mellomanna kjem til uttrykk gjennom nomineringa til «Årets Nykommar» i NRK P3 Gull.
«Årets Nykommar» går til artistar, band eller produsentar som har markert seg spesifikt gjennom mykje merksemd og stor aktivitet. Det skal ligga sterke forventningar om ein vidare karriere i tida som kjem.
Om Aurora skriv juryen:
«Hun har – til tross for sin svært lave alder – alt. Aksnes er glitrende låtskriver og melodisnekker, har en sterk stemme og et liveuttrykk preget av sterk tilstedeværelse og modenhet. Til tross for at hun bare kan skilte med et par utgitte låter, knyttes det allerede enorme forventninger til debuten – både nasjonalt og internasjonalt. Det hun mangler er år på baken, og det sier mye.»
Dei andre nominerte i kategorien er: Kaja Gunnufsen, Kygo, Store P og Frk. Fryd.
Prisane «Årets liveartist» og «Årets låt» blir òg delt ut. I desse kategoriane kan P3-lyttarane vera med å stemma fram vinnarane.
Dei nominerte til årets liveartist er: Highasakite, Team Me, OnklP & De Fjerne Slektningene, Kvelertak, Emilie Nicolas.
Dei nominerte til årets låt er: Store P: «Vikje være i din verden», Gabrielle: «5 fine frøkner», OnklP & De Fjerne Slektningene: «Styggen på ryggen», Kaveh feat. OnklP: «Snufs», Highasakite: «Since Last Wednesday».
I tillegg vil ein fagjury dela ut P3-prisen til ein artist eller eit band som har utmerka seg spesielt. Artisten eller bandet betyr mykje for P3-lyttarane og norsk musikk- og kulturliv.
P3 Gull blir sendt live på NRK3 og NRK.no