Aurora signerte med tysk forlag

Music Norway - musikkbransjen sin eksportorganisasjon melder at den talentfulle osajenta Aurora Aksnes, i helga signerte publishingavtale med tyske Budde Music.

Budde Music er eit av dei mest suksessrike forlaga i Europa med alt frå Alphaville til internasjonale låtskrivarar og tekstforfattarar i katalogen.

- Vi er veldig stolte av å få moglegheiten til å jobba med denne eksepsjonelt talentfulle låtskrivaren.

– Vi gler oss til å sjå korleis Aurora vil overraska oss i nær framtid. Budde Music sitt mål er å hjelpa ho med å utvikla seg både som låtskrivar og artist, seier internasjonal A&R i Budde Music, Seth Hodder til nettstaden.

Har allereie starta samarbeidet

Sjølv om avtalen først blei signert i helga har Aksnes allereie jobba med forlaget.

– Under forhandlingane har Aurora allereie skrive fleire låtar saman med fleire av Budde sine folk i Berlin.

– Vi håpar å vera klare med band til by:larm 2014 og ei plate seinare på året, seier Geir Luedy i Made Management.

Rett til topps

Aurora Aksnes gjekk rett til topps på Urørt si liste på NRK då ei venninne lasta låta "Puppet" opp i desember i fjor.

– Eg hadde aldri turt å lasta opp låta sjølv, sa Aksnes til Midtsiden då.

No har ho altså tatt steget vidare ut i Europa.