Avduka rekordlaksen

Bildeserie:

1 av 2

Tirsdag 20. august beit det skikkeleg på spinneren Eivind Aasen fiska med i Kvernhushølen i Oselvo. På land klarte han å få ein 18 kilo stor laks, truleg den største dei siste 30 åra.

I samband med årsmøtet i Os Jakt og Fiskeforening torsdag blei ein avstøping av rekordlaksen avduka i klubbhuset, Ulvehiet, på Ulven.

Arbeidet med å gjenskapa fisken har taksidermist og konservator Helge Haukeland stått for.

– Det var ein artig, men samstundes utfordrande og tidkrevande jobb, fortel Haukeland.

På bilete av Kvernhushølen

Laksen er laga tredimensjonal, noko som i seg sjølv er litt uvanleg.

– Vanlegvis tek ein berre ei halv avstøping og monterar fisken flatt på ei plate.

– Her hadde eg lyst til å laga ein installasjon med heile laksen i sitt rette element og kor du kan sjå korleis den jobbar rett etter at han har høgd til på spinnaren, forklarar Haukeland.

For å få til det har han mellomanna vore i Oselvo og tatt undervatnbileter frå Kvernhushølen kor fisken blei fanga.

Lag på lag

Prosessen med å laga reproduksjonen har gått over fleire steg.

– Først tok eg ei avstøping ved hjelp av silikon. Det gjorde at eg fekk ein 100% kopi.

– Deretter blei fisken støp i spesialgips før det møysommelege arbeidet med å mala den tok til.

– Først brukte eg transparent maling ved hjelp av airbrush for å få dybde i fargane.

– Du veit det er eit univers av fargar på den.

– Etter det var det fram med penselen for å mala kvart einaste skjell individuelt.

– Eg var så heldig å ha mange av dei gode bileta Ole Vidar Søviknes hadde tatt av laksen rett etter den kom på land til å hjelpa meg med, fortel Haukeland.

Kor mange timar han har nytta på arbeidet tørr han ikkje tenkje på, men at det har tatt dager og månader er det liten tvil om.