Kultur | 12. mars 2011

Baby! Fjorden kjem!

Tre nye klare for Søfteland: Mykje har skjedd sidan Fjorden Baby var headliner på Søfteland i 2008. I år kjem dei tilbake.

Baby! Fjorden kjem!
Kjetil Vasby Bruarøy
Kjetil Vasby Bruarøylørdag 12. mars 2011 06:15

Tôg, Jeroan Drive og Fjorden Baby slår følgje med blant andre Kråkesølv og Ida Maria til Søfteland denne sommaren.

- Dette er femte festival på rad og vi kallar det jubileum. Og har du jubileum så har du lov til å dra inn det beste frå dei oppsummerte åra, seier Andreas Lindborg frå Søfteland Rock N LoL.

Fin start for Fjorden

Det var ikkje mange frå Os som visste kven Fjorden Baby var då dei i 2008 runda av festivalen, som det året var flytta frå hagen til foreldra til brørne Lindborg til garden til Olav Valle.

- Likevel ropte publikum «Fjorden», «Fjorden», «Fjorden» til dei kom på scenen. Eg trur bandet var nøgd med velkomsten den gong, og dei har ved fleire tilfelle dei første åra sagt at det var den kulaste staden dei hadde spelt.

Terningkast 6

Sidan den gong har bandet frå Loddefjord både platedebutert, fått strålande omtale og kome med oppfølgjaralbum som fekk terningkast 6 hos VG.

- Eg var på releasepartyet for «Se Deg Rundt I Rommet» på onsdag og eg trur 2011 kjem til å bli eit veldig bra år for Fjorden Baby, seier Andreas.

- Mykje har skjedd med Fjorden sidan sist, og eg trur kanskje dei merker at mykje har skjedd med Søfteland Rock N LoL sidan 2008 òg.

Ekte hardcore

Jeroan Drive kjem til Søfteland for å gje ein leksjon i korleis hardcore skal både sjå og høyrast ut. Både gitaristen og trommisen har vore opptatt med andre prosjekt, bland anna Blood Command, som var nominert til Spellemannsprisen i år.

- Dei er for pionerar å rekna innan sjangeren hardcore og no er dei tilbake. Men dei skal spela få konsertar i år, så dette blir ei eksklusiv oppleving, seier Lindborg.

Bandet har blant anna gjeve ut EP og debutalbum, fått omtale magasin som Kerrang og Metal Hammer og vore i studio igjen og spelt inn album nummer to.

Stavangerband med god sans

Vi har tidlegare skrive om kor god teft LoL-arrangørane har, band etter band har sitt gjennombrot rett før eller rett etter at The Lindborgs har booka dei.

I år får søftelendingane besøk av eit band frå Stavanger med god sans, låta «Sansen» fekk mykje sendetid på radio i fjor, det same gjorde den andre av dei to første singlane til Tôg, «Reint Mel».

- Etter at vi såg bandet på by:Larm tidlegare i år er det liten tvil om at Tôg kjem til å prega våren, sommaren og resten av året med sin svært fengande popmusikk. Sjølv om bandet framfører tekstane sine på stavangerdialekt har dei likevel klart å imponera såpass at dei står på programmet på verdas største musikkbransjetreff, South By South West, i Texas.

- Dei gjer også ein liten turné i statane og er klare for Øyafestivalen i august. Men før det står dei på scenen på Rock N LoL, seier Andreas nøgd.

Startar billettsalet

Årets Rock N LoL går av stabelen på den same garden som før, fredag og laurdag 15. og 16. juli.

- På måndag legg vi ut dei første billettane, og sidan vi har jubileum i år blir det jubileumsprisar ut april.

- No er 10 band klare, kor mange fleire blir det plass til?

- Vi er nok berre rett over halvvegs, så vi har meir på lur, meir å gle seg til, lover Andreas.

Frå før står desse artistane på årets plakat:
• Ida Maria
• Kråkesølv
• Wolves Like Us
• Death By Unga Bunga
• ORBO & The Longshots
• Norma Sass
• Neoplasma



Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.