Bahus og Grodås møttest igjen

Tysdag ettermiddag har Frode Grodås keepertrening med 17 lokale ungdomar på Kuventræ, med påfølgande ope foredrag for spelarar, trenarar og andre interesserte.

Før han kom til Os ba han om å få møta tidlegare motstandar Vidar Bahus. Dei to har spelt fleire gongar mot kvarandre då Grodås var i Lillestrøm.

Bahus bur ein halv spasertur frå Kuventræ, og stilte naturlegvis opp.

– Kor tid var sist de spelte mot kvarandre?

– Det var fleire gongar, men eg hugsar ikkje årstalet, seier Frode, som i dag er trenar for landslagkeeperane.

Men Bahus hugsar det godt.

– Det var i semifinalane i NM i 1995. Borte tapte vi (SK Brann) 3-1, heime vann vi 4-1 og tok oss til cupfinale, seier Vidar med eit lurt glis.

Cupfinalen mot Rosenborg endte uavgjort 1-1 etter ekstraomgangar. Omkampen vann Rosenborg 3-1.

I kvar sin ende av banen

Det blei tid til ein venskapeleg prat mellom dei to tidlegare toppkeeperane.

Sånn er det, ifølgje dei to, ofte mellom keeperar.

– Vi er i kvar vår ende av banen, det blir ingen fysiske duellar keeperane imellom, og det eine unnar i grunnen aldri den andre å gjera dei store tabbane sjølv om du ønskjer å vinna kampen, seier Vidar.

Frode er einig.

– Det blir ofte eit eige, kollegialt forhold mellom keeperar, det er sjeldan at dei ikkje går godt i lag.

– Men om det først er dårleg stemning mellom keeperar, så er det skikkeleg dårleg stemning, seier Grotås og ler.

God historikk

Før Frode Grodås (53) i 2010 blei trenar for herrelandslaget sine keeperar spelte han på øvste nivå i over 20 år, frå debuten for Sogndal som 17-åring i 1982 til landskamp mot Danmark i 2002. Grodås har blant anna vore med på å slå Brasil i VM 1998, vunne finalen i FA-cupen i 1997 med Chelsea og blitt seriemeister med Lillestrøm i 1989.

Bahus gjekk frå Os til Fyllingen i 1988, der han var ein svært populær spelar, og med på å få Fyllingen opp å øvste nivå i 1990 og til cupfinale same år (tapte 1-5 for Rosenborg). Frå 1995 til 1999 fekk han 55 seriekamper, 14 cupkamper og 9 europacupkamper med SK Brann - i tillegg til to kampar mot Liverpool FC i kvartfinalen i UEFAs cupvinnercup 1997. I 1997 tok han sølv i serien med Brann.