Benk på avveg?
– Kvifor står det ein benk i hesteløypa i Osmarka, lurer ein lesar på. BOF forklarer, og fortel samtidig om sol-svoltne osingar.
Ein benk har kome på plass i hesteløypa i Osmarka.
Det er ikkje ein unaturleg plass å setja ein benk, men ein lesar som har sendt bilde til Midtsiden har lagt merke til friluftsrådet sitt merke på benken og lurer på om den kan vera stolen.
– Det er ikkje friluftsområde der benken står, men det er nok ein benk som vi har gjeve vekk, seier driftsleiar i BOF, Oddmund Dingen.
Han fortel at osing og tidlegare formann i BOF, Dagfinn Riple, har spørt friluftsrådet om å få denne benken for utplassering i det populære turområdet.
– Vi hadde nokre benkar ståande og syntes det var ein god idé. Det er mange som er glade i å gå tur, også blant dei som treng ein pause av og til. Og då kan ein benk vera med på å auka turgleda, seier Dingen.
Desperat etter sol?
Ein annan plass i Os er ein benk flytta på, truleg ikkje av bøller, men av sol-svoltne osingar.
– Dei fleste benkane våre er festa med kjetting, for å unngå tjuveri eller at dei blir flytta for mykje rundt så det blir rotete på friluftsområda.
– Ved Banktjørn har vi ein benk som var festa i ein påle som sto éin meter ned i bakken. Men denne har nokon flytta nærmare brygga, truleg fordi det er sol der litt lenger.
No vil BOF ta benken på plass og banka pålen lenger ned i jorda.