Besteforeldre og nabolag gledde seg over privatkonsert

Os Musikkforening marsjerte inn i hagen og spelte «Song til Os».

Kjetil Osablod Grønvigh
Kjetil Osablod Grønvighmandag 18. mai 2020 12:32

Os Musikkforening kunne førre veke fortelja om ei kreativ løysing på eit problem mange korps opplever om dagen; å få inntekter når musikk eigentleg er ein sosial ting, med smittevernreglar hindrar folk å samlast.

Svaret vart å lodda seg sjølv ut til ein 17.mai-konsert i hagen til vinnaren.

Og vinnaren er; Familien Korps!

På fredagens øving vart det klart at vinnarloddet var kjøpt av 11 år gamle Synne Hjertaker. Synne speler sjølv i Os skulekorps, og mora til Synne, Hilde, speler i Os Musikkforening.

Forvirra?

Synne løyste det heile med å gje vekk premien til besteforeldra Randi Stave Hegnes og Terje Hegnes.

Konsert for heile nabolaget

Med besteforeldra transportert frå Bergen og klare på ein terrasse i Vågshaugen samla Os Musikkforening seg på parkeringsplassen ved barnehagen i Kuvågen.

Med Synne i front marsjerte korpset seg inn i nabolaget, til stor overrasking for skodelystne naboar.

Vel framme stilte korpset seg opp i hagen for å overlevera premien.

Stolte og spente besteforeldre klare for ein heilt spesiell konsert. (Foto: KOG)

– Dette gjorde godt

Dei frammøtte, og ein god del naboar som klappa og hoia frå bak hekkar og tre, fekk oppleva eit knippe marsjar, nasjonalsongen, og ikkje minst «Os-songen» i eit vêr som best kan oppsummerast som alle sesongar på 20 minutt.

Skodelystne naboar klappa og hoia med. (Foto: KOG)

Etter konserten var det eit par særs nøgde besteforeldre som kunne takka for opplevinga;

– Vi har lege bak oss ei tid med mykje inne-sitjing no, og vi plar alltid begge vera aktive på 17. mai, så dette gjorde godt.

– All ære til Synne for å gje oss denne opplevinga. Dette var stas!

Det vart ein flott konsert i eit vekslande vêr. (Foto: KOG)

Os Musikkforening sel normalt for 50.000 kroner i lodd på våren, i år var ambisjonen å få inn 10.000 kroner.

Den gjeve premien har nok vore medverkande til at korpset klarte rundt det doble av målsetnaden.

Også russen måtte bidra. (Foto: KOG)

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.