Torbjørn Wilhelmsen, direktør i Bergen-Os Bompengeselskap AS, på veg ut av Endelausmarka etter markeringa i dag. (Foto: KVB)

Betaler 100 mill i månaden på E39

Bompengeselskapet har allereie ein milliard i gjeld, men har spart millionar. Kva skal det kosta å bruka den nye vegen?

Av: Kjetil Vasby Bruarøy

– Vi har allereie ein milliard i gjeld, men har samtidig spart millionar, seier Wilhelmsen.

Wilhelmsen er direktør i Bergen-Os Bompengeselskap AS. I dag var han blant gjestane då Statens vegvesen markerte gjennomslag i Skogafjellstunnelen.

Sjå video frå salven og bli med inn i fjellet

– Det er fantastisk å koma inn her og sjå, og eg merker allereie på rekningane som kjem inn at produksjonen er høg, seier Torbjørn Wilhelmsen.

Høge utgifter - ingen inntekter

Bygginga av E39 Svegatjørn-Rådal kostar 6,5 milliardar kroner, rekna i 2014-prisnivå.

Staten tar 60 prosent av rekninga, resten skal bilistane betala, men ikkje i byggeperioden.

– Produksjonen er høg, det blir bygd veg for 100 millionar kroner i månaden på prosjektet, fortel Wilhelmsen.

Han får rekning med dei enorme summane 5-6 gongar i året. Ved årsskiftet hadde Bergen-Os Bompengeselskap allereie ein milliard i gjeld.

Har spart fleire millionar

Bergen-Os Bompengeselskap AS er eigd av Hordaland fylkeskommune (52 %), Os kommune (24 %) og Bergen kommune (24%).

Wilhelmsen ser lyst på både den store produksjonen av veg og på situasjonen bompengeselskapet står i.

• Les òg: Han skal låna 2,6 millardar kroner

– Vi har vore utruleg heldige med rentenivået, det er jo nesten unntakstilstand.

Snittrenta selskapet har betalt ved utgangen på 2016 var på 1,82 %.

– Vi er neppe like heldige i tida som kjem, blant anna fordi vi no skal inn på lån med lengre bindingstid, men vi har allereie spart fleire millionar kroner dette førsta halvanna året i forhold til budsjett.

Kor mykje må vi betala i bompengar?

Det var i utgangspunktet planlagt parallell-innkreving under byggeperioden. Dette blei tatt vekk under den politiske behandlinga sentralt, etter påtrykk av Søviknes.

Kva det skal kosta å bruka den ny E39 mellom Os og Bergen etter opning i 2022 er førebels ikkje bestemt.

– Satsane på bompengane vil nok tidlegast koma eit år før opning. Vi treng ferske tal på både kostnad og trafikk før dette blir bestemt, seier direktøren i bompengeselskapet.

– I bompengesøknaden opererte vi med 42-43 kroner i per passering, men dette er i snitt. Det blir naturlegvis ulik pris for små og store bilar, og det kjem rabattløysingar, forklarer han.

Fleire saker